ASNN – Pas përvojave me italianë, Dinamo është rikthyer tek shqiptarët, duke mos humbur kohë dhe duke prezantuar trajnerin e ri. Vetëm 24 orë pas u mësuar largimi i papritur i treshes italiane, trajnerit Françesko Moriero, ndihmës të tij, Fabricio Mikolit dhe përgatitësit atletik, Kristian Parabita, blutë kryeqytetas kanë vendosur që Olsi Uku do të jetë trajneri i ri i Dinamos.
31-vjeçari jo vetëm që është një ish-lojtar i bluve, por ka edhe një të shkuar në stolin e 18-herë kampionëve të Shqipërisë që dergjen prej vitesh në nivelin e dytë të Kampionatit Kombëtar të Futbollit. Në kohën e trajnerit të mëparshëm të Dinamos, Fabricio Kamaratës, i cili u largua në fund të vitit të shkuar për të marrë drejtimin e Apolonisë në Superiore, Uku ka qenë zëvendës-trajner i tij dhe më vonë iu bashkua Nevil Dedes në të njëjtin rol te Tirana.
Duket se zgjedhja e presidentit Marko Pontreli është ndikuar edhe nga fakti se, duke qenë se pjesa dërrmuese e lojtarëve të Dinamos nuk kanë ndryshuar, Uku ishte kandidati më i përshtatshëm për këtë detyrë. Në një njoftim të klubit të Dinamos në profilet e tij në rrjetet sociale, theksohet fakti se “Uku është një njohje e vjetër e ekipit pasi ka qenë në rolin e zv/trajnerit edhe gjatë sezonit të kaluar, por edhe si trajner i ekipit të Nën-21-vjeçarëve.”
“Trajneri i ri ka mbështetjen e plotë të presidentit Pontreli dhe stafit blu, ndërsa shihet si zgjedhja më optimale, falë edhe njohjes së skuadrës nga afër”, – përfundon njoftimi i klubit kryeqytetas. Uku do të ketë menjëherë sfidën e parë në stolin e Dinamos, e cila ndeshet të mërkurën pasdreke në kryeqytet me Veleçikun, në takimin e vlefshëm për javën e 13-të të Kategorisë së Parë. Dinamo mban vendin e dytë në renditjen e grupit A apo grupit të Veriut, me 23 pikë, dy më pak se Burreli kryesues, që sidoqoftë ka luajtur një ndeshje më tepër sesa blutë kryeqytetas.
