Administratori Saliaj sot takim me trajnerin Mehmeti për të qartësuar gjërat për përforcimet. Një qendërmbrojtës, një mesfushor-organizator dhe një sulmues, këto janë kërkesat e bluve. Kohë më parë Dinamo ka diskutuar jo vetëm ardhjen e Daniel Xhafajt, i cili në këtë periudhë ka bërë stërvitje me blutë, por diku është folur dhe për kapitenin e kavajasve, Bekim Kuli, si një mesfushor që di ta marrë skuadrën për dore dhe ta çojë atë drejt fitores.

Mirëpo administratori i bluve, Ismet Saliaj, nuk ka dëshirë të bëjë të ditur emra, ndërsa ka pohuar se sot do të ketë dhe një takim me trajnerin Dritan Mehmeti me të cilin do të sqarojë të gjitha gjërat që kanë lidhje me përforcimet. “Aktualisht, – thotë Saliaj, – nuk mund të them emra, por ajo që ka nevojë skuadra është një sulmues, një mesfushor-organizator dhe një qendërmbrojtës.”

“Ne do ta kishim mirëpritur Daniel Xhafajn, sepse edhe ai është treguar dashamirës për të ardhur të luajë me Dinamon, – ka vijuar ai. – Madje nëse gjërat arrijnë në pikën e përbashkët mes palëve, atëherë them se me Xhafajn zgjidhim problemin e sulmit dhe nuk kërkojmë më. Do të flasim dhe shpresoj që shpejt të gjejmë më të mirët e mundshëm për Dinamon.”

“Kjo skuadër ka nevojë për lojtarë të afirmuar dhe që t’i japin ndihmë për t’u ngjitur në Kategorinë Superiore”, – ka përfunduar administratori i Dinamos, Ismet Saliaj. Ndërkaq skuadra është lënë pushim të dielën e të hënën, kurse të martën do t’i kthehet stërvitjeve deri në fund të vitit dhe më pas në ditët e para të janarit do të vijojë me periudhën përgatitore të dimrit, atje ku një muaj duket se do të jetë përgatitje intensive për ekipin.