ASNN – Që në fillimin e sfidës do të jenë vendësit, që drejtohen nga trajneri Ilir Gjyla, ata që do të vihen në kërkim të golit dhe me kalimin e minutave e zhvendosin lojën në portën dinamovite. Nga ana tjetër, blutë nga kryeqyteti mundohen të mbrohen mirë dhe të zënë në befasi kundërshtarin me anë të kundërsulmit. Lundraxhiu do të ketë rastin e parë për peqinasit, ku godet me kokë pas krosimit të Gjatës, por topi kalon ngjitur me shtyllën.

Sulmet vazhdojnë dhe në minutën e 9-të “i shenjti” Kotorri bën një mrekulli të dyfishtë, teksa grushton goditjet e njëpasnjëshme të Dervishit dhe Llucës. Dinamo bën “sehir” në fushë dhe e dorëzon shumë shpejt topin në këmbët e kundërshtarit, i cili kërkon me ngulm golin. Por edhe pse gjatë pjesës së parë rastet për shënim do të jenë të shumta, goditjet e tyre hasin në barrikadën e Kotorrit, që nuk lejon kurrsesi prekjen e rrjetës.

Edhe fraksioni i dytë i lojës do të ketë të njëjtën “simfoni” si edhe i pari, teksa janë vendasit ata që bëjnë lojën dhe sulmojnë. Dy minuta nga fillimi i saj, goditja e dënimit të Gjatës grushtohet nga Kotorri dhe më pas topi përfundon në traun e portës blu. Peqinasit nuk u besojnë syve, ndërsa dinamovitët sërish i falet Kotorrit dhe fatit. Minutat kalojnë dhe presioni rritet nga të dyja kampet.

Por edhe pse rastet nuk do të mungojnë, rezultati do të mbetet i pandryshuar deri në fund me peqinasit që me atë që dhanë në fushë kanë humbur dy pikë, ndërsa miqtë nga Tirana morën një pikë që i mban ende në “valle” për Superioren. Mesa duket miqtë nga kryeqyteti kishin ardhur me synimin të mos humbisnin dhe me shumë fanatizëm dhe me një Kotorr në formë shumë të mirë ia dalin paq nga “ferri” peqinas.

Shkumbini – Dinamo                       0-0

Shkumbini: Ajazi, Lundraxhiu, Turhani, E. Magani, Sulkja, Nexha, Kafazi, Lluca, Xhyra, Gjata (Gjata 74’), R. Dervishi. Trajner: I. Gjyla.

Dinamo: Kotorri, Thana, Shkalla, Shazivari, Allmuca, Arifaj, Tafaj, Imami (Rezi 62’), Ferraj (Capa 80’), Turdiu, D. Xhafaj (Muça 56’). Trajner: D. Mehmeti

Gjyqtarë: R. Sadiku, E. Bodeci, E. Sinanaj (Elbasan)

Kartonë të verdhë: E. Lundraxhiu, Dervishi, Xhyra / Thana

Karton i kuq: Sorra

Kategoria e Parë

GRUPI B

Java e 15-të

Të shtunën:

Bylis – Tomori                        1-0

Shënues: Basriu 46’

Stadiumi “Adush Muça”, Ballsh

Pogradeci – Sopoti               1-2

Shënues:Pengu 61’ / Idrizaj 23’, Begeja 35’

Stadiumi “Gjorgji Kyçyku”, Pogradec

Shkumbini – Dinamo           0-0

Fusha Sportive, Peqin

Lushnja – Butrinti                 0-0

Stadiumi “Roza Haxhiu”, Lushnjë

Naftëtari – Luftëtari               1-0

Shënues: Kopaçi 10’

Stadiumi “Bashkim Sulejmani”, Kuçovë

Renditja

Nr.       Skuadra         N.        F.         B.        H.        Gsh-Gp          Pikë

1. Lushnja 15        7          5          3          18-8                26
2. Dinamo 15        6          6          3          18-12              24
3. Butrinti 15        6          5          4          18-9                23
4. Bylis 15        7          2          6          17-16              23
5. Sopoti 15        6          4          5          15-19              22
6. Pogradeci 15        5          4          6          12-13              19
7. Tomori 15        6          3          6          12-14              18
8. Luftëtari 15        5          2          8          11-17              17
9. Shkumbini 15        4          3          8          15-20              15
10. Naftëtari 15        3          6          6          11-19              15

(Tomorit i janë 3 pikë nga renditja me vendimin e FIFA-s për rastin Vrucina)