Dinamos do t’i mungojë Ferraj në këtë ndeshje me Shkumbinin, pasi mesfushori i majtë është i skualifikuar me tre kartonë të verdhë. Por së paku kthehet Duqi nga skualifikimi, në një kohë që janë të rrezikuar për skualifikime të mëtejshme Turdiu, Thana e Muça, që kanë nga dy kartonë të verdhë.

Jo vetëm kaq, por dje Capa e Muça kanë qenë në fizioterapi, sepse kanë dëmtime të lehta në kavilje dhe në gju. Dinamo ka nisur avazin, sepse dhe dje ka qenë e përqendruar në fushë kalçetoje në kompleksin e minifutbollit të Pishinave. Por një avaz i tillë do të vazhdojë dhe sot, sepse ende nuk ka përfunduar Kupa “Coca-Cola”.

Dhe të mërkurën, Dinamo do të nisë përgatitjet me Shkumbinin në fushën me bar artificial të ish-kompleksit blu. “Sepse do të shfrytëzojmë orarin e Kukësit, që do të jetë i angazhuar në Kupën e Shqipërisë”, – ka përfunduar Saliaj, kurse Dinamo vijon të vuajë problematikën e një fushe jo të veten.