ASNN – Blutë fitojnë 2-1 ndaj Korabit, takimi erdhi drejtpërdrejt në RTSH Sport. Të shtunën janë luajtur edhe 5 ndeshje të nivelit të dytë të Kampionatit Kombëtar të Futbollit, në Kategorinë e Parë, në grupin A, në betejën e “play-off”-it, Burreli ka fituar në fushë të huaj, 3-0 ndaj Vorës.
Ndërkaq, Korabi është mundur me përmbysje nga Dinamo, me shifrat 1-2, në takimin e sjellë për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH Sport. Matjanët kryesojnë me 37 pikë, të ndjekur nga blutë e kryeqytetin, me dy pikë më pak, ndërsa dibranët mbajnë vendin e 3-të, me 33 pikë.
Në betejën e “play-out”-it të këtij grupi, Oriku mundi Besëlidhjen 1-0 dhe Partizani B fitoi ndaj Veleçikut 2-0. Kurse në grupin B është luajtur vetëm një duel i vlefshëm për “play-out”-in dhe Elbasani është mundur me një gol të vetëm në fushën e vet përballë Lushnjës.
Dy ndeshjet e fundit të betejës së “play-off”-it të Grupit B luhen të dielën pasdreke dhe Besa përballet me Egnatian, kurse Pogradeci viziton Tomorin. Kjo ndeshje do të sillet për sportdashësit drejtpërdrejt nga Rrjeti i Radio-Televizionit Shqiptar, në kanalin RTSH Sport, duke nisur nga ora 13:30.
