ASNN – Dinamo e Zagrebit mbërriti në Shqipëri për ndeshjen e parë të “play-off”-it të Ligës së Kampioneve ndaj Skënderbeut, që do të luhet të mërkurën në mbrëmje në Stadiumin “Elbasan Arena”. Në këtë ekip me emër në Ballkan dhe Evropë luan edhe shqiptari Endri Çekiçi, i cili vlerëson skuadrën korçare, por shpreson që Dinamo të kalojë turin.

“Skënderbeu ka krijuar një ekip mjaft të mirë dhe nuk është rastësi është shpallur 5 vjet rresht “kampion” i Shqipërisë, më bëhet qejfi që kanë mbërritur në këtë fazë, por shpresojmë që të kualifikohemi”, – ka thënë shkurtimisht për mediat futbollisti shqiptar i Dinamos së Zagrebit, Endri Çekiçi, i cili është, për ironi të fatit, djali i Ylli Çekiçit, një ish-lojtari të Skënderbeut ndër vite.

Një tjetër shqiptar që ka luajtur për Dinamon e Zagrebit dhe përfaqësuesen e Kroacisë, gjakovari Ardian Kozniku, thotë se kualifikimi do të vendoset në ndeshjen e kthimit pas një jave. “Nuk përfundon nesër, por në Zagreb, – thotë Kozniku. – Do të luhen dy ndeshje, pasi, në të parën, trajnerët shikojnë kundërshtarët dhe e dyta mendoj që do të jetë më e fortë.”

Ndërsa presidenti i ekipit kroat, Zdravko Mamic mendon se e vetmja pikë e fortë e Dinamo është përvoja. “E respektojmë Skënderbeun si një kundërshtar shumë serioz, – ka thënë kreu i klubit nga kryeqyteti i Kroacisë. – Nuk ka mbërritur pa meritë deri këtu, pasi ka fituar disa tituj radhazi në Shqipëri dhe ka lojtarë shumë të mirë. Vështirë të them favoritin, por ne mund të na ndihmojë përvoja e madhe që kemi’.

Dinamo e Zagrebit nuk do të ketë në këtë sfidë sulmuesin Adrian Ademi, i cili është i dëmtuar.