Trajneri Mehmeti: Më thoni ju si t’i motivoj lojtarët në të tilla kushte, nuk ka fjalë ta shpjegojë. Dinamo e ka përgatitur në kafe ndeshjen me Lushnjën, të cilën do ta luajë sot në Stadiumin “Selman Stërmasi” në ora 14:30. Ka ndodhur kështu, sepse blutë, edhe me urdhrin e administratorit Ismet Saliaj, nuk e kanë zbatuar kërkesën e Agjencisë së Shërbimit të Sporteve për të dalë në stërvitje në ora 09:00, ndërsa në orën 11:00 do të bënte Sopoti. Dhe në fakt në ora 11:00, blutë së bashku me trajnerët kanë qenë të gatshëm për stërvitjen e fundit, ashtu sikurse dhe librazhdasit e Gentian Stojkut.
Për të mos krijuar tensione, por dhe përplasje, aq më tepër që janë dy skuadra të të njëjtit grup në Kategorinë e Parë e vetëm një javë më parë janë ndeshur mes tyre në “Nexhip Trungu” të Cërrikut, atëherë drejtori i Agjencisë së Shërbimit të Sporteve, Bledar Doçi, ka gjetur kompromisin. Pasi ka folur me të dy trajnerët, edhe duke qenë se ishte stërvitja e fundit përpara ndeshjes, e cila nuk shkon më shumë se sa një orë, Sopoti i Stojkut ka bërë 11:00-12:00 dhe Dinamo e Mehmetit 12:00-13:00. Përgjatë stërvitjes së Sopotit, Dinamo ka qenë në kafe.
Ndaj dhe trajneri i bluve, Dritan Mehmeti, e ka pasur të vështirë të flasë për atë që do të ndodhë sot në përballjen me Lushnjën në “Selman Stërmasi”. “Më thoni ju, – shpjegon Mehmeti për “Gazeta e Sportit”, – se si do të mund t’i motivoj lojtarët për ndeshjen sot. Jemi të gjithë në kafe, presim të mbaroj Sopoti që të nisim stërvitjen ne. Nuk ka fjalë ta shpjegojë këtë situatë që ndodh me Dinamon, e cila është më shumë se sa absurde”. Megjithatë për rreth një orë, Dinamo më pas ka përgatitur përballjen me myzeqarët duke shpresuar se do të rikthehet tek fitorja, që mungon që në javën e parë në ndeshjen ndaj Luftëtarit në Gjirokastër, 2-0.
