ASNN – Trajneri i përfaqësueses së Francës, Didier Deshomp, është shprehur për mediat franceze se Shqipëria e meritonte plotësisht kualifikimin për në Kampionatin Evropian, duke shtuar madje se renditja e grupit I ishte shumë e drejtë dhe korrekte e në bazë të meritave të skuadrave. “Ju më pyesni kush e meritoi”, – ka deklaruar ish-futbollisti i mirënjohur, tashmë trajner i “Les Blues”.
“Unë po ju tregoj të vërtetën, pasi ne jemi përballur me të gjithë ekipet e këtij grupi, – vijoi ai. – Dy vendet e para, Portugalia dhe Shqipëria,e merituan suksesin. Renditja është e drejtë. Shqipëria ishte ekip më i fortë se Danimarka.” Fjalët e zgjedhura teknikisht të Deshompit ishin një qëndrim mjaft i drejtë, po të mendohet e Serbia dhe Danimarka, po “ankohen” për rezultatet e kuqezinjve.
Me pak fjalë, Shqipëria ka skuadër më të mirë se Danimarka. Dhe ky nuk është një opinion çfarëdo, por ai i trajnerit të Francës, Didier Deshomp. Njeriu që udhëhoqi francezët në Botëror vitin e kaluar, pati mundësi t’i njihte dy skuadrat, pasi u ndesh me ta jashtë dhe brenda vendit. Pas fitores 2-1 në Kopenhagen ndaj Danimarkës, Deshompi iu përgjigj pyetjes së gazetarëve danezë se, Shqipëria ishte më e mirë.
“Kombëtarja e Shqipërisë na nxorri më shumë probleme në ndeshjet që luajti ndaj nesh, – tha Deshamp. – Ne pësuam një humbje dhe arritëm një barazim, ndërsa me Danimarkën e patëm më të lehtë. Për këtë arsye, mendoj se Shqipëria aktualisht është më e mirë se ju, dhe se e meritoi kualifikimin.” Kombëtarja shqiptare barazoi 1-1 në Francë dhe fitoi 1-0 në “Elbasan Arena”.
Ndërsa Danimarka pësoi dy humbje me francezët, 0-2 dhe 1-2. Sidoqoftë, ky gjykim i Deshompit, nuk i la shije të mirë homologut të tij danez, Morten Olsen. Ky i fundit theksoi se pavarësisht se përfundoi më lart në renditje, është e diskutueshme nëse ekipi shqiptar është më i mirë. Olsen tha se loja e skuadrës së De Biazit ishte “tejet mbrojtëse” ndaj Francës, diçka që ai nuk ka dëshirë që ta kopjojë.
Megjithatë, veterani i stolit shtoi se për momentin, ai duhet të mendojë për “play-off”-in dhe jo për krahasimin me shqiptarët.
