ASNN – Shkumbini ka marrë fitoren e parë në këtë kampionat, teksa i ka shënuar 4 gola në shtëpi Naftëtarit. Ka mjaftuar dygolëshi i Sulkjes dhe golat e vëllezërve Magani për t’u dhënë tri pikët peqinasve, të cilët tanimë nuk janë të fundit në renditje. Nga ana tjetër, Naftëtari ka qenë një kundërshtar i dobët, që për asnjë moment nuk ia bëri të vështirë fitoren peqinasve.
Shkumbini që në minutat e para e nis mjaft mirë ndeshjen, sepse ushtron presion në zonën kundërshtare dhe vihet në kërkim të golit. Rastet nuk do të mungojnë, por goli i parë i takimit do të shënohet nga Sulkja në minutën e 20-të, i cili kontrollon siç duhet një top të dhënë nga Artur Magani dhe godet fort. Topi përplaset në shtyllë dhe më pas përfundon në rrjetë.
1-0 për peqinasit që çlirohen nga ky gol dhe u hapet “oreksi” për të tjerë. Tetë minuta më pas është radha e Artur Maganit për të dyfishuar rezultatin, me një gol “familjar”. Endri Magani kroson në zonë, me topin që preket nga Xhyra, dhe gjithçka më pas përfundon në këmbët e tp vëllait, Artur Maganit që me portën pothuajse bosh nuk gabon dhe e shtyn topin në rrjetë.
2-0 dhe zgjidhet gjithçka shumë shpejt. Pjesa e parë nuk do të ketë ndryshim rezultati. Në të dytën vazhdon e njëjta histori, me Naftëtarin që e ka të pamundur për t’u organizuar dhe për të rrezikuar, ndërsa peqinasit administrojnë më shumë lojën. Megjithatë fundi i ndeshjes do të sillte edhe dy gola të tjerë për vendasit, të cilët do të korrnin kështu një fitore bindëse.
Në minutën e 83-të është Endri Magani që shfrytëzon siç duhet një top të harkuar në zonë dhe qetësisht godet duke trefishuar shifrat. Ndërsa një minutë para përfundimit të kohës së rregullt, në të 89-n, është sërish Sulkja ai që firmos dygolëshin e tij personal dhe hipotekon një triumf me mjaft vlera për të tijtë, sepse bardhekaltrit marrin fitoren e parë në këtë kampionat.
SHKUMBINI – NAFTËTARI 4-0
Shënues: Sulkja 20’, 89’, A. Magani 28’, E. Magani 83’
Shkumbini: Ajazi, Mehmetaj (Duka 70′), Turhani, Isai, E. Magani, Sulkja, Kafazi, Kuçi (Dervishi 60’), Lluca, Xhyra, A. Magani (Nexha 46’). Trajner: I. Gjyla
Naftëtari: Mema, Kaja, Daci (Lapi 25’, Koroveshi 75’), Gucaj, Çekrezi, Alushi, Gega (Alushi 83’), Hima, Kopaçe, Zylyftari, Mullaj. Trajner: P. Bifsha
Gjyqtarë: E. Demiraj, A. Mema, G. Kamolli (Pogradec)
Kartonë të verdhë: Kafazi / Gucaj
Karton i kuq: Hodaj (në pankinë)
