Ju kujtohet David Koperfildi, jo personazhi i librit, por iluzionisti i famshëm, i cili arriti të zhdukte edhe vagonin e trenit në një nga numrat e tij? Koperfildi i futbollit tonë, presidenti Duka, ka realizuar këto ditë një numër edhe më të bujshëm, kur, brenda natës, gjeti formulën për t’i kthyer derbit popullin bardheblu. Një magji, që vazhdon vetëm një ndeshje, aq sa mund të gënjejë një derbi me bëmat e tij dhe më pas… tifozët bardheblu do të veshin rrobat me vija të të “burgosurit” deri në muajin prill.
Edhe fjalët e trajnerit Duro e ndezin paralojën kur pickon me thumbin ironik se “Është gjë e bukur që do të rikthehen tifozët e Tiranës në derbi, por kur Tirana të luajë me Skënderbeun… do të ndihet përsëri e vetmuar”. Me këtë që ndodhi, thonë se edhe zyrtarëve të komisioneve të FSHF-së u ka rënë maska dhe vlera, sa autogoli i fundit i ka bërë të përçahen. Njëra palë, e cila është mësuar me fjalën magjike të shefit, thërret “rroftë Duka”, kurse tjetra, që ndihet e fyer me prepotencën e tij, thërret “poshtë Duka”.
Kuptohet, me zë të ulët, sepse cili do të guxonte të kapërcente ylberin e zyrave? Futbolli ynë është lojë iluzionesh, ndaj edhe besojmë te magjitë që ndodhin nga java në javë. Në Asamble të gjithë e ngjyrosim me zell fushën e hipokrizisë me kartonët jeshilë, tani pse habitemi kur pragmatizohet thënia e vjetër se, kur topi është i imi edhe rregullat i bëj veçse unë.
Ata që kuptojnë sadopak nga loja e padukshme, nga ajo që në mënyrë figurative çmohet si loja pa top e shefave, kanë shansin të deshifrojnë idenë se UEFA i ka mësuar federatat ta fryjnë dhe ta shfryjnë topin sipas interesit. Ndaj, në Europë, në emër të 3-pikëshit, po luajmë akoma rolin e viktimës, sapo kthehemi në oborrin tonë, viktima vesh rrobat e xhelatit.

* Botohet me lejen e autorit dhe duke respektuar ekskluzivitetin kohor të së përditshmes më të madhe sportive në Shqipëri, “Panorama Sport”.

http://www.panorama-sport.com/opinion/derbi-me-tifoze-rrofte-duka-poshte-duka/#ixzz3LOTFKelt