ASNN – Daniele De Rosi është zyrtarizuar të martën tek Roma dhe do të jetë në krye të ekipit deri në fund të këtij edicioni. 40-vjeçari, i cili zëvendëson Zhoze Murinjon, u prezantua nga klubi roman dhe, gjatë konferencës për shtyp, ai u shpreh i lumtur për besimin e dhënë. Dhe duket se emërimi i tij ka marrë edhe miratimin e emrave të mëdhenj të futbollit italian, ish-trajnerë dhe bashkëlojtarë të tij.
“De Rosi ka mundësine e tij për të demonstruar se ai mund ta bëjë këtë punë, edhe nëse ka vetëm 4 muaj përvojë, – ka deklaruar ish-trajneri i mirënjohur, ndër të tjera, edhe i Romës, Fabio Kapelo. – Avantazhi është se ai e njeh mirë mjedisin roman dhe presionet që mbart ky mjesë dhe shpresoj se mund ta bëjë këtë punë, të fitojë, pavarësisht sfidës që duhet thënë se është e ndërlikuar.”
Ndërkaq, një tjetër ish-trajner i Romës, Luçiano Spaleti, tashmë në krye të stolit të përfaqësueses së Italisë, është shprehur optimist, duke uruar që De Rosi të shijojë suksesin edhe si trajner pas një karriere të pasur si lojtar. “Këtu do te vërtetohet nëse ai do të vazhdojë karrierën e tij të shkëlqyer në futboll, qe e ka pasur si futbollist, tani duhet ta bëjë nga e para ne stol”, – ka thënë ai.
Edhe një ish-shok skuadre tek përfaqësuesja e Italisë, ish-portieri i njohur, Xhanluixhi Bufon, e ka cilësuar De Rosin si zgjedhjen e duhur për Romën. “Unë e imagjinoj atë si një fëmijë që hidhet në shtrat me pizhame me entuziazëm, sepse ka marrë atë që dëshiron më shumë. Në një moment të tillë nuk mund të kishte njeri më të përshtatshëm se Daniele”, – ka përfunduar ai.
