ASNN – Ndryshe nga mediat, specialistët e futbollit e shohin sfidën më të madhe të ndeshjes së sotme tek ata që do të luajnë në fushën e blertë, sesa tek ata që janë në shkallët e stadiumit. Duke bërë një analizë të gjendjes në prag të kësaj sfide Shqipëri-Serbi, trajnerët Armando Cungu dhe Ernest Gjoka, si dhe specialisti Ermal Tahiri, e vënë theksin tek qetësia dhe përqendrimi i skuadrës.
Cung beson se fitorja me serbët është plotësisht e mundshme, por ajo nuk do të vijë nëse ekipi do të ngarkohet emocionalisht dhe do të bëhet pjesë e “eksitimit” që ka kapur turmën e tifozëve.
“Ana psikologjike është kryesore, sepse kjo ndeshje do të jetë emocionale, – thotë trajneri i Laçit. – Nga aq sa jemi informuar flitet për një situatë elektrizuese, ku kërkohet medoemos fitorja dhe lojtarët vetë janë të karikuar. Në këndvështrimin tim grupi duhet që t’i përgjigjet De Biazit, kërkesave të tij dhe këshillave të tij. Unë vetë në aspektin taktik nuk kam dyshim që De Biazi është “njësh”.”
“Dhe e ka treguar këtë edhe në ndeshjet e shkuara, por këtu është problemi tek lojtarët, të cilët duhet të jenë të qetë, të pandikuar nga mjedisi që i rrethon dhe të respektojnë detyrat e tyre taktike”, – ka theksuar Cungu. Ndërsa për Gjokën, ndeshja e sotme është një ndeshje me dimension të madh, ku një fitore na çon drejt e në një ëndërr shumëvjeçare që të gjithë shqiptarët po e presin me padurim.
“Përveç anës sportive, është dhe ana emocionale, e cila kam frikë se mund të na frenojë për të bërë më të mirën e mundshme, sepse situata është e nxehtë duke parë intervistat, duke parë interesim e madhe të të gjithë mediave të huaja, që e kanë trysnuar mjedisin e pragndeshjes dhe kjo gjë nuk shkon për interesin e ekipit tonë kombëtar”, – ka theksuar trajneri i disa skuadrave në Kategorinë Superiore.
Nga ana tjetër, ish-futbollisti i Kombëtares dhe Dinamos, Ermal Tahiri, e vë theksin tek ruajtja e qetësisë. “Nëse biem në provokimet e serbëve, ne nuk fitojmë asgjë, – këmbëngul ai. – Duhet të kemi parasysh diçka: Platinia nuk na e fal 3-pikëshin që ne ja morën në “CAS”-in e Lozanës, prandaj duhet shumë kujdes për ndërprerje të mundshme të ndeshjes… sot nuk fiton rreshtimi, skemat apo taktikat, sot fiton zemra.”