Ora 12 e 20 minuta e ditës së djeshme ka shënuar dhe fundin e Rrethit të 73-të Çiklistik të Shqipërisë, ndërsa finishi i etapës së pestë, që bashkë me prologun bëjnë gjashtë etapa, është prerë nga i zakonshmi i këtij turi çiklistik. Bëhet fjalë për Ylber Sefën, që jo vetëm që ka dominuar, por me paraqitjen e tij i ka habitur të gjithë. Një çiklist i kompletuar jo vetëm në terrenet malore, por dhe ato kodrinore e fushore, me një tip sportivi e fituesi si në ngjitje, ashtu dhe në zbritje.

E në çdo cep nuk e ka pasur të vështirë të jetë në vendin e parë. Aq sa emri i tij ka qenë jo vetëm pjesë e bisedave të specialistëve të çiklizmit, por dhe të forcave të policisë rrugore, që kanë shoqëruar këtë Rreth të 73-të Çiklistik të Shqipërisë. Kështu ka bërë dhe dje, ndërsa në metrat e fundit drejt Gracenit ka lënë nga pas Sufajn e Banushin dhe nën sirenat shoqëruese të policisë rrugore ka hyrë i pari. 5 etapa nga 6 të këtij rrethi janë fituar prej tij.

Ndërsa që pas finishit në Burrel duket se ka qenë i sigurt për fitoren e tij në rreth çiklistik në vend. Është ndarë me finish me Sotën në Durrës, por në Pogradec e më pas në Gracen, fitorja ka qenë për fanellën e verdhë të këtij Rrethi Çiklistik, Ylber Sefën. Që njëkohësisht ka qenë dhe fituesi i Rrethit Çiklistik të Shqipërisë për herë të parë në karrierën e tij. Në podium jo vetëm për etapën Pogradec-Gracen, por dhe për të gjithë Turin Çiklistik, janë ngjitur dhe Besmir Banushi dhe Altin Sufaj.

Për të nderuar tre fituesit e etapës së djeshme kanë ardhur trajnerët e “Team Giro”, Bosnje-Hercegovinë, Hajrudin Tërle, ai i Malit të Zi, Branko Hajdukoviç, si dhe i Maqedonisë, Petrovski. Ndërkohë për fituesit e Rrethit janë përkushtuar për të dhënë diplomat trajneri i Apolonisë, Kiço Kalemi, Drejtori i Sporteve në Ministrinë e Arsimit dhe Sportit, Vladimir Gjonaj dhe presidenti i Federatës Shqiptare të Çiklizmit, Skënder Anxhaku.

Rrethi i 73-të Çiklistik i Shqipërisë

Rezultatet teknike të etapës së 5-të

(Pogradec-Gracen, 109 kilometra)

Nr.       Çiklisti (Skuadër)                 Koha

1. Ylber Sefa (Tirana)              2h48’40”
2. Altin Sufaj (Apolonia)          2h49’01”
3. Besmir Banushi (Apolonia)           2h49’09”

Renditja e përgjithshme pas 6-të etapash:

Nr.       Çiklisti (Skuadër)                 Koha

1. Ylber Sefa (Tirana)              15h16’14”
2. Besmir Banushi (Apolonia)           15h18’10”
3. Altin Sufaj (Apolonia)          15h19’06”

Renditja e përgjithshme ekipore:

Nr.       Skuadra                     Koha

1. Apolonia                    46h03’19”
2. Mali i Zi                      46h14’45”
3. Tirana                         46h20’04”