Nëse do të jetonte këtë maj, Agim Tafili do të festonte 56 vjetorin lindjes së tij. Por edhe pse sot ai nuk nuk është i pranishëm, i ndarë nga jeta në janarin e katër viteve më parë, Federata Shqiptare e Çiklizmit e ka nderuar me një kupë të posaçme me emrin e tij, e cila tashmë është shndërruar në tradicionale vit për vit. 20 pjesëmarrësit për kategorinë e kadetëve dhe 30 të tillë për kategorinë e të rinjve dhe të elitës pedaluan në dy ditë të programit të kësaj veprimtarie.

Në ditën e dytë të veprimtarisë, u zhvillua dy garat e tjera, ato me itinerar Shkodër-Qafë Qelë dhe Kthim për kadetë dhe Shkodër-Pukë dhe kthim për të rinj dhe elitë. Ashtu si edhe në ditën e parë, finishet e këtyre etapave janë bërë në sheshin e lagjes “Parrucë”, aty ku tradicionalisht prej shumë e shumë vitesh ndajnë emocionet e finishit çiklistët pjesëmarrë të garave kombëtare. Dy gara këto që kanë spikatur si më të mirët çiklistët e Vllaznisë dhe të Apolonisë.

Të parët, ato kuqeblu të cilët prej dy vitesh janë nën kujdestarinë e ish-çiklistit të njohur shkodran, Leonard Kola, fillimisht si president dhe tashmë si trajner i tyre, kanë surprizuar teksa kanë dalë fitues në konkurrimin për kategorinë e paratërinjve dhe të të rinjve, ndërsa fierakët, që në krye kanë një emër legjende si Kiço Kalemi, nuk kanë falur duke qenë absolutë në konkurrimin për kategorinë e të rriturve të elitës.

Në ceremoninë përmbyllëse të krejt veprimtarisë, ku u ndanë edhe kupat dhe çmimet përkatëse për individët dhe ekipet fituese, presidenti i Federatës Shqiptare të Çiklizmit, Skënder Anxhaku, ka vënë në dukje përgatitjen e mirë të çiklistëve pjesëmarrës, të cilët i dhanë bukuri aktivitetit në fjalë. Krahas përgëzimit për ekipin fitues të të rriturve me në krye trajnerin Kalemi, presidenti Anxhaku ka vënë në dukje rritjen në mënyrë të ndjeshme të Vllaznisë, e cila pritet të jetë ekipi pretendent për fitimin e trofeve të vitit.

Ndërkohë Federata Shqiptare e Çiklizmit ka nderuar me “Mirënjohje” Kryetaren e Bashkisë Shkodër, Voltana Ademi.

Kupa “Agim Tafili”

Çiklizëm – Meshkuj

Rezultatet teknike të ditës së dytë:

Paratërinjtë

(Shkodër-Qafë-Qelë-Shkodër, 70 kilometra)

Nr.       Çiklisti            (Klubi)                                   Koha 

1)       Gjergj Zefi (Vllaznia)                        1h48’00”

2)       Bruno Kola (Vllaznia)                     1h52’12”

3)       Sokol Morana (Vllaznia)                 + 1”

Si ekip: Vllaznia

Të rinj

(Shkodër-Qafë Qelë-Shkodër, 70 kilometra)

Nr.       Çiklisti            (Kombësia)                           Koha 

1)       Mario Nika (Vllaznia)                       1h50’41”

2)       Kledison Cani (Vllaznia)                1h52’12”

3)       Mersin Durmishi (Partizani)           + 1”

Si ekip: Vllaznia

Elitë

(Shkodër-Pukë-Shkodër, 95 kilometra)

Nr.       Çiklisti            (Kombësia)                           Koha 

1)       Besmir Banushi (Apolonia)                       2h37’10”

2)       Altin Sufaj (Apolonia)                      2h37’57”

3)       Klindi Grevi (Tirana)                                    2h38’18”

Si ekip: Apolonia

Sportisti më i mirë: Astrit Kronaj (Vllaznia)