ASNN – Me Trofeun “Dita e Verës”, veprimtari në të cilën morën pjesë 12 skuadra të vendit, çiklizmi shqiptar ka ngritur siparin sa u përket garave të këtij viti. Në këtë garë pedaluan kategoria e Paratërinjve (kadetëve) me itinerarin Elbasan-Shalës-Elbasan, me gjatësi 50 km, si edhe kategoritë e Të Rinjve (Xhunjor) dhe të Nën-23-vjeçarëve dhe Të Rriturve (Elitës), me itinerarin Elbasan-Belsh-Elbasan, i gjatë 97.1 km.
Në të dyja garat nuk ka pasur probleme rrugës, e cila ka vijuar e qetë, në sajë edhe të një moti të qëndrueshëm përgjatë ditës së djeshme në qytetin e Elbasanit. Sa i përket fituesve, vendi i parë në kategorinë e paratërinjve (kadetëve) i takoi çiklistit të Flamurtarit, Skerdi Gjonaj, i cili mposhti me fotofinish Markeljan Debullën e Skënderbeut, ku të dy i përshkuan 50 km me kohën 1 orë, 30 minuta dhe 10 sekonda.
Vendi i tretë i takoi Rinaldo Harunajt të Flamurtarit me kohën 1 orë e 30 minuta dhe 50 sekonda. Sa i përket kategorisë së Të Rinjve (Xhunjor) dhe të Nën-23-vjeçarëve dhe Të Rriturve (Elitës) ishte një garë e fortë midis disa çiklistëve, por në fund me fotofinish triumfoi Henri Hysa i Teutës, me kohën 2 orë e 34 minuta. Pas tij u renditën sportisti i Vllaznisë, Mateo Balaj dhe ai i Tiranës, rumuni Dimitri Produnukau.
Vlen të theksohet se në këto gara mori pjesë edhe një vajzë, Marsela Luzi e Teutës, e cila garoi në kategorinë e paratërejave dhe e mbylli garën me një kohë të kënaqshme, 1 orë e 34 minuta. Kjo garë u mbajt edhe në kuadër të kremtimeve të Ditës së Verës në qytetin e Elbasanit dhe kreu i Federatës së Çiklizmit, Skënder Anxhaku, i vlerësoi këto gara të mbajtura dhe uroi të gjithë sportistët pjesëmarrës me ekipet e tyre për rezultatet e arritura.
