Çiklizmi shqiptar ka shpallur dje kampionët e kronometrit për të tre kategoritë, paratërinjtë, të rinjtë dhe elitën. Në ceremoninë e dorëzimit të trofeve ka qenë i pranishëm presidenti i Federatës Shqiptare të Çiklizmit, Skënder Anxhaku, presidenti i Komitetit Olimpik Kombëtar Shqiptar, Viron Bezhani. Anxhaku ka vlerësuar jo vetëm kontributin e çiklistëve, të cilët kanë sfiduar të nxehtin për të bërë një garë me nivel, por dhe gjyqtarinë, si dhe policinë e shtetit e cila ka qenë mbështetëse gjatë gjithë segmentit rrethrrotullimi i TEG-Kristal Center e kthim.

Për shkak të kategorive, gara ka qenë e ndarë në kilometra e xhiro të ndryshme; 12.5 kilometra për paratërinjtë, 25 kilometra për të rinjtë dhe 37.5 kilometra për elitën. “Më duhet të vlerësoj, – thotë presidenti i Federatës Shqiptare të Çiklizmit, Skënder Anxhaku, – mbështetjen që na ka bërë presidenti i kompanisë së Ujit Lajthiza, Hajri Elezi. Po kështu falënderoj dhe të gjithë ata që kontribuan në këtë garë të parë. Një nivel shumë i lart dhe jam i kënaqur me paraqitjen që kanë bërë çiklistët”.

E për shkak së të nxehtit të madh, teksa temperaturat në Tiranë dje kanë shkuar dhe 40 gradë celsius, atëherë është vendosur që gara e rrugës të bëhet sot paradite. “Në ora 09:00 do të jetë nisja për paratërinjtë dhe të rinjtë dhe në ora 10:00 për Elitë”, – ka përfunduar Anxhaku, ndërsa ky kampionat individual është dhe një provë gjenerale për Kampionatin Ballkanik të Elitës dhe Nën-23-vjeçarët, që do të zhvillohet në Elbasan nga data 1, deri më 3 korrik 2016.

Kampionati Kombëtar i Çiklizmit

për Paratërinjtë, Të Rinjtë & Elitën

Rezultatet teknike të garës së kronometrit

Paratërinjtë (12.5 km)

Nr.       Çiklisti (Ekipi)                                    Koha

1. Bruno Kola (Vllaznia)                     16’08”
2. Amarildo Goga (Apolonia)              16’20”
3. Serxhio Gjoshi (Burreli)                  16’36”

Të rinjtë (25 km)

Nr.       Çiklisti (Ekipi)                                    Koha

1. Klidi Jaku (Romanjono Itali)           30’12”
2. Erion Toska (Teuta)                         32’52”
3. Kledison Cani (Vllaznia)                34’46”

Elitë (37.5 km)

Nr.       Çiklisti (Ekipi)                                    Koha

1. Eugert Zhupa (Sothuest Itali)        44’01”
2. Ylber Sefa (Tirana)                          45’47”
3. Laert Bregu (Apolonia)                   48’36”