…vijon nga dje
ASNN – Megjithatë, rrugëtimi që e ka çuar këtë etapë nga Prrenjasi, në Librazhd, nëpër Unazën e Elbasanit dhe drejt Peqinit, ka bërë që të dy grupet të shkrihen dhe diferencën në finishin e Elbasanit do ta bëjnë sprintierët. Duke përfituar edhe nga një gabim i Xhuliano Kamberajt në një kthesë të fundit, Nikolas Marini i skuadrës rumune të “MSTina Fokus” vjen i pari në vijën e finishit, duke lënë pas çiklistin kuqezi, i cili fiton betejën me italianin Paolo Toto. Duke folur për Radio-Televizionin Shqiptar pas gare, Kamberaj ka shprehur keqardhjen për fitoren e munguar. Ndërsa për presidentin Anxhaku, ky podium i Kamberajt është një ogur i mirë.
Etapa e 3-të, ajo Elbasan-Vlorë, e cila ishte 171.9 km e gjatë, ka patur një ndryshim mjaft të rëndësishëm, sepse, ndryshe nga edicioni i vjetshëm, itininerari i saj nuk e përfshinte ngjitjen e Qafë-Krrabës, çka e ka shndërruar atë në një etapë fushore. Për këtë arsye, ajo do të shndërrohet edhe në etapën me shpejtësinë më të madhe të garimit, plot 46.2 kilometra në orë. Gara do të zhvillohet kryesisht në grup dhe vetëm teksa i afroheshin Vlorës, kanë nisur të përvijohen edhe përpjekjet e para për shkëputje, sidomos nga sprintierët. Dhe podiumi i garës do të përbëhet po nga ajo 3-she që u ngjit edhe në Elbasan, por këtë radhë rolet u këmbyen.
Nikolas Marini, i pari në Elbasan, u detyrua të kënaqej me vendin e 3-të në Vlorë, ndërsa Xhuliano Kamberaj e fitoi sërish betejën me Paolo Totonë, duke përsëritur kështu triumfin e edicionit të shkuar pikërisht në këtë etapë. Një fitore kjo që e ka gëzuar mjaft çiklistin vlonjat që garon në Itali. Gëzimin nuk e ka fshehur as kreu i dyrrotakëve shqiptarë, Skënder Anxhaku. Mesdita e 22 majit ka parë zonën e fillimit të Lungomares në Vlorë të pushtohet nga çiklistët, ndërsa i pranishëm ka qenë edhe kryetari i Bashkisë së Vlorës, Dritan Leli.
Si kryebashkiaku vlonjat, ashtu edhe Anxhaku, kanë vënë në pah rolin që këto veprimtari sportive kanë edhe për promovimin turistik të Shqipërisë. Leli ka dhënë edhe startin e kësaj etape, e cila, ndonëse ka qenë më e shkurtëra, me vetëm 122.8 km, ka qenë edhe më e ngadalta, me vetëm 34.63 km/orë. Kjo për arsye se itininerari i kësaj gare etape, e cila më e bukura, pasi e ka çuar Rrethin e 75-të Çiklistik përgjatë brigjeve të Rivierës Shqiptare, duke ofruar edhe tablo piktoreske, ka patur në përbërje edhe Llogaranë. Në fillim mali i ka sfiduar çiklistët në një ngjitje të vështirë, ku padyshim kanë spikatur specialistët e malores.
Pastaj ai i ka shpërblyer ata me një zbritje që padyshim ta çon adrenalinën në nivele maksimale. Një specialist i malores, siç ishte Nikola Gafurini i skuadrës së “Sanxheminit”, i cili pati marrë edhe fanellën e kuqe të “mbretit të malit” edhe edicionin e shkuar të këtij Rrethi Çiklistik, ka përfituar më së miri nga itinerari i kësaj etape, duke u shkëputur që në Llogara, e duke vijuar ta ruajë kryesimin edhe në gjarpërimin e garës nëpër fshatrat e bregut, që u kanë ofruar çiklistëve të huaj një kartolinë të bukur shqiptare.
Vijon nesër…
