ASNN – Rrethi i 75-të i Shqipërisë ka ulur të mërkurën pasdreke siparin e një tjetër edicioni të jashtëzakonshëm të tij, që ishte i dyti që zhvillohej me parametra ndërkombëtarë dhe që ishte pjesë e kalendarit të Unionit Ndërkombëtar të Çiklizmit, duke e konsoliduar kështu Shqipërinë në arenën botërore të dyrrotakëve. Duke shfrytëzuar përvojën e përfituar nga edicioni i vjetshëm, teksa janë korrigjuar ato pak të meta që u vunë re dhe u përsos edhe më tej i gjithë sistemi i organizmit, logjistikës dhe garimit, ky edicion jubilar konfirmoi gjithashtu edhe potencialin në rritje të vetë Federatës Shqiptare të Çiklizmit, të drejtuar nga Presidenti Skënder Anxhaku.
Në fakt, rrugëtimi që do ta çonte këtë Rreth nëpër një itinerar prej 809.8 kilometrash përgjatë kryeqytetit, lindjes, jugut e më pas jugperëndimit të vendit, nisi nga Sheshi “Skënderbej”, në Tiranë, me një ceremoni që i la vendin startit të garës. Etapa e parë do të ishte ajo Tiranë-Korçë, 165 kilometra e gjatë, e cila do t’i sfidonte çiklistët me të gjitha llojet e terrenit, duke nisur nga pjesa fushore midis kryeqytetit dhe Elbasanit, përmes tunelit të Kërrabës, për të vijuar me rrugëtimin drejt Librazhdit dhe Prrenjasit dhe duke i sfiduar çiklistët në maloren sfilitëse të Qafë-Thanës, ku i pari në finishin e malit ka mbërritur Mikele Gaxara.
Italiani i skuadrës së “Sanxheminit” nuk ka lëshuar as në vijim, duke vijuar të kryesojë i vetëm edhe drejt Pogradecit, por edhe më pas, drejt Qafë-Plloçës, ku ka mbërritur i pari edhe në një tjetër finish, atë të sprintit fushor. Kjo ka bërë që ai të shkëputet edhe më nga grupi, që në fakt është mbajtur mjaft mirë nën kontroll nga shokët e tij të skuadrës. Për rrjedhojë, Gaxara do të vijë i pari në finishin e Korçës, me kohën 3 orë, 58 minuta e 10 sekonda. 1 minutë e 22 sekonda pas tij do të mbërrijë kroati Bruno Maltar i skuadrës kroate të Meridiana Kamen, ndërsa podiumin do ta plotësojë një tjetër çiklist i “Sanxheminit”, Antonio Di Sante.
Duke folur pas garës për Rrjetin e Radio-Televizionit Shqiptar, Gaxara është shprehur i kënaqur që strategjia e skuadrës së tij funksionoi, pasi ajo kishte konsistuar në provën e tij për shkëputje, si dhe në mbajtjen nën kontroll të grupit ndjekës nga pjesa tjetër e ekipit italian, teksa sfiduesi i vetëm, kroati Maltar, nuk mundi të ruante ritmin e 27-vjeçarit të “Sanxheminit”. Sa u përket çiklistëve shqiptarë, më i miri i kuqezinjve do të ishte Ridion Kopshti, i cili mbërriti i 21-ti në finish, kurse Klidi Jaku erdhi i 36-ti, Xhuliano Kamberaj i 49-ti, Besmir Banushi i 52-ti e Iltjan Nika e Marolino Hoxha përkatësisht i 56-ti e i 57-ti.
Etapa e dytë, ajo Korçë-Elbasan, e cila ishte edhe më e gjata e Rrethit me 189.9 kilometra, ka nisur me një nderim për çiklistin e njohur korçar, Mishel Çiço, të ndarë tashmë nga jeta. Më pas, gara ka vijuar me pedalimin nga Korça drejt Qafë-Plloçës, e më pas drejt Pogradecit, ku është shkëputur një grup prej 4 çiklistësh. Pas Pogradecit, çiklistët janë sfiduar sërish nga Qafë-Thana, por tanimë në krahun e kundërt të saj, çka nënkupton më pak malore dhe më tepër zbritje, ndërsa 4-shja e shkëputur ruan largësinë nga grupi kryesor.
Vijon nesër…
