Kombëtarja shqiptare e çiklizmit për të rinj dhe për moshën deri në 23 vjeç ka qenë pjesëmarrëse në Kampionatin Evropian, i cili u zhvillua fundjavën e kaluar në Estoni. Delegacioni shqiptar, i kryesuar nga Presidenti i Federatës Shqiptare të Çiklizmit, Skënder Anxhaku, është kthyer të hënën në vendin tonë. Dhe në një prononcim për të përditshmen sportive shqiptare “Sport Ekspres”, i pari i çiklizmit shqiptar ka pranuar që kuqezinjtë nuk patën fat.
“Ajo që duhet të them është fakti se skuadra deri përpara nisjes për në Estoni ka qenë në formë, – ka thënë ai. – Nuk patëm fat në short dhe në përgjithësi gara e rrugës është zhvilluar në terren aspak të përshtatshëm. Dhe kjo gjë është vërë re dhe nga drejtuesit e UCI-t, ndërsa rruga ishte shumë e ngushtë. Për fatin e mirë na ka shpëtuar mirë nga një aksident tragjik Ridion Kopshti, i cili u rrëzua, bëri një salto në ajër dhe ra përpara makinës. Për fatin e mirë nuk e kapi makina.”
“Një nga polakët përfundoi në arë. Në përgjithësi garë e vështirë për të gjithë dhe nuk patëm fat”, – ka thënë Anxhaku. Çiklizmi shqiptar bëhet gati tashmë të marrë pjesë në Kampionatin Ballkanik të Të Rinjve, që zhvillohet nga data 7, deri më 9 shtator në Turqi, si dhe në Botërorin e Amerikës. “Më duhet të them se do ta shtyjmë Rrethin Çiklistik, sepse na bie keq me Ballkaniadën, atje ku do të shkojmë të tregojmë forcën reale të çiklistëve tanë”, – ka përfunduar Anxhaku.
