Për 201 kilometra është në grupin e parë të çiklistëve, ndërsa ka marrë katër pikë në një nga finishët e etapës që përfundoi në Olbia. Eugert Zhupa, çiklisti i Uilier Triestinës, në pjesëmarrjen e tij të tretë në Xhiron e Italisë, ka qenë shqiponja kuqezi. I 157-ti para dy vjetësh, i 130-ti vitin e kaluar, ndërsa paraqitja e tij shënon të tjera maja, sepse në etapën e parë Algero-Olbia, 206 kilometra të gjatë, ka qenë në grupin e parë. E jo pak, por për 201 kilometra, ndërsa së bashku me Maestrin, Benedetin, Brutin, Bialoblokin dhe Teklehaimanotin kanë udhëhequr garën.
Në një nga finishët e kësaj etape, teksa bëhet fjalë për fanellën e kaltër, Zhupa është i treti, teksa ka marrë 4 pikë. 7 minuta e 8 sekonda ka qenë epërsia e tyre më e madh, ndërsa grupi i madh i çiklistëve të shpejtë, gjithnjë në ndjekje, arrin të ngushtojë distancën. E megjithatë Zhupa është mbajtur, ndërsa është dukur sikur është ndalur 16 kilometra nga fundi. Përkundrazi, me 3 të tjerë ka ecur edhe 12 kilometra të tjerë derisa e kanë ulur ritmin.
Në finish, ndonëse në një kthesë të gjerë ka dhe rrëzime, por dhe defekte, i pari ka hyrë austriaku Lukas Pëstlberger, që është fanella e kuqe e parë Xhiros së 100-të të Italisë. Austriaku ka përfituar nga një moment pauze i atyre që kërkonin të shpërthenin në metrat e fundit të garës, ndërsa i ka befasur të gjithë. Pas tij ka ardhur Kaleb Evans dhe në vendin e tretë gjermani Andre Greipel. Zhupa është “kampion” i Shqipërisë e jo vetëm kaq, por dhe “kampion” i Ballkanit në garën e kronometrit dhe të rezistencës.
Është i pari çiklist profesionist që përfaqëson Shqipërinë në Itali e si i tillë me këtë paraqitje të jashtëzakonshme duhet vlerësuar si një arritje që në etapën e parë. Nëse koha e vendit të parë të austriakut ka qenë 5h13’34, australiani Evan ka ardhur 4 sekonda pas tij, kurse gjermani Greipel 6 sekonda pas të parit. Dhe Zhupa, që 5 kilometrat e fundit ka qenë me grupin e madh ka mbërritur në vendin e 107-të, ndërsa ka qenë 18 sekonda pas austriakut. Megjithatë cilësohet një garë cilësore, ndërsa të gjithë presin të tjera paraqitje të tilla të tij në Itali.
