Ashtu si dikur, kur mbërrinte në finishin e sheshit “Zogu i parë” së bashku me kolegët e tij të pedalimit Agim dhe Sytki Tafili, Leonard Kola, Sabedin Hoxha, etj, edhe dje Brahim Syka ka bërë të njëjtën gjë. Në fakt, që pas largimit nga sporti, një ritual të tillë si një njeri shumë aktiv në çiklizmin shkodran, si dhe në forumet drejtuese të FSHÇ-së, ai vazhdon ta bëjë duke mos u ndarë për asnjë çast nga çiklizmi.

Por, për të, dje ka qenë një ditë krejt e veçantë, pasi e organizuar kishte emrin e tij. “Mos pyesni për emocionet, – ka rrëfyer ai. – U riktheva edhe njëherë si 20-30 vite më përpara. Ndjehem shumë i kënaqur dhe shumë i vlerësuar. Faleminderit që u kujtua dikush për mua. Falënderoj Federatën Shqiptare të Çiklizmit, që ishte nismëtare e kësaj veprimtarie.”

“Falënderoj Bashkinë Shkodër për organizimin, si dhe drejtuesit e Klubit Shumësportësh “Vllaznia”, – ka vijuar Syka. – Djemtë tonë bënë një figurë të mirë dhe prandaj jam shumë i kënaqur. Kemi të bëjmë me një brez të ri shumë të talentuar. Dua të ndalem pak tek çiklistët e rinj dhe me shumë perspektivë shkodranë. Janë në fazën që kanë ende se çfarë të mësojnë, por dua të theksoj se është një brumë shumë i mirë.”

“Janë djem të talentuar dhe të pasionuar. Prandaj jam i bindur se perspektiva e këtij sporti në Shkodër është e mirë. Por duhen më tepër investime për të sepse është një sport që e pëlqen Shkodra, e pëlqen Shqipëria”, – ka përfunduar ish-çiklisti shkodran, Brahim Syka.

Kupa “Brahim Syka”

Çiklizëm – Meshkuj

Rezultatet teknike të ditës së dytë

Paratërinj/Të Rinj

(Milot – Shkodër, 60.5 km)

1)         Bruno Kola (Vllaznia)                     1h36’20”

2)         Alfons Rashkadoli (Vllaznia)         1h36’21”

3)         Sali Ballgjini (Teuta)                                    1h37’46”

Nën-23-vjeçarët/Elitë

(Kashar – Shkodër, 81 km)

1)         Krisel Sota (Apolonia)                     2h18’25”

2)         Olsian Veliaj (Tirana)                      2h20’15”

3)         Marolino Hoxha (Apolonia)                        2h20’15”