ASNN – Natyrisht në zhargonin e përditshëm, atë shpesh e kanë cilësuar si një person, i cili, kur është i acaruar, bën si “ato gratë e këqija”. Dhe në fakt Zhoze Murinjo e ka dëshmuar një gjë të tillë edhe gjatë ditëve të fundit, duke mos kursyer as femrat. Mjekja e parë e klubit të Çellsit, dhe ajo që bëri bujë si e para mjeke femër në këtë nivel të sportit të meshkujve, Eva Karneiro, ka rënë viktimë e sensit të tepruar të protagonizmit të trajnerit portugez të londinezëve.
Këtë herë, trajneri portugez është vendosur në qendër të vëmendjes pas mllefit të shprehur ndaj mjeke së skuadrës së tij, Eva Karnieros, në javën e parë të Premier Ligës, ku “blutë” e Londrës nuk shkuan dot më larg se një barazim 2-2 në fushën e vet me Suonsin. Në një moment të lojës, Karniero dhe stafi i saj u thërritën në fushë për shkak të një dëmtimi të Eden Hazardit. Në atë kohë, skuadra e Çellsit ishte me 10 lojtarë në fushë dhe mbajtja e Hazardit jashtë ishte një luks i tepërt.
Por stafi mjekësor po vononte në nxjerrjen e diagnozës dhe marrjen e vendimit nëse Hazardi mund të luante ose jo më tej. Kjo la Çellsin për pak kohë me 9 lojtarë përballë skuadrës mike dhe kaq mjaftoi që “I Veçanti” të tërbohej dhe mllefin e shkarkoi të gjithin në drejtim të Eva Karneiros. Ai e akuzoi atë si naive dhe e gjithë skena u kap nga kamerat e pranishme në “Stemford Bridxh”. Në përfundim të ndeshjes, i pyetur nga gazetarët për këtë incident, ai tha se, nëse është mjek apo sekretare, një person që ndodhet në stolin e ekipit duhet të marrë vesh nga futbolli.
Eva Karneiro është mjeke e Çellsit që prej vitit 2009, kur ishte me të rinjtë. Vijash-Boash e mori në skuadrën e parë verën e 2011-tës dhe këtë pozicion e mbajti edhe me trajnerët që vijuan, Di Mateon, Rafael Benitezit dhe Zhoze Murinjon. Ashpërsia e tij ndaj Karneiros pasuan një reaksion kritikash ndaj trajnerit portugez dhe një mbështetje për mjeken simpatik. Kjo e fundit ka falënderuar të gjithë publikun për mbështetjen e dhënë, nëpërmjet një postimi në profilin e saj në rrjetin social, “Facebook”.
Por pikërisht ky postim i saj duket se i ka kushtuar shtrenjtë, pasi, duke u justifikuar me një ristrukturim të strukturës mbështetëse dhe stafit mjekësor, “inatçori” Murinjo praktikisht e ka shkarkuar atë nga detyra. Sipas asaj që raportojnë mediat britanike, Karneiro nuk do të ulet më në stolin e Çellsit gjatë ndeshjeve, nuk do të lejohet të hyjë në hotelin e skuadrës dhe as ta ndjekë atë nga afër në stërvitje. Ajo do të kryejë kryesisht detyra të dorës së dytë për llogari të klubit londinez.
