ASNN – Luftëtari humbet me kryesuesen e grupi të Jugut, Lushnjën, dhe tashmëështë shumë pranë rënies në Kategorinë e Dytë. Është vetëm një pikë larg Naftëtarit dhe dy pikë larg Shkumbinit, ndërsa të mërkurën do të jetë në Peqin përballë vendësve. Atje ku një humbje do t’ia vështirësonte edhe më qëndrimin në të Parën. Ndaj Lushnjës, Luftëtari zhvilloi më shumë volum loje dhe krijoi shumë raste shënimi, por nuk shkoi dot tek goli. Përveç 11-metërshit që i dha fitoren, lushnjarët patën vetëm një rast shënimi në fundin e ndeshjes me Cankën, që i vetëm përballë portierit Thano gjuan jashtë.
11-metërshi për Lushnjën, të paktën sipas bluzinjve, ka qenë shumë e dyshimtë, sepse topi është devijuar me sup nga Shenaj dhe jo me dorë siç ka dashur ta shohë gjyqtari Ziri. Megjithatë Luftëtari nuk e kontestoi këtë vendim të gjyqtarit, pasi ishte vetëm fillimi i ndeshjes. Dhe pas disavantazhit 0-1, bluzinjtë e Devollit shpresonin që ta përmbysnin këtë rezultat. Nuk ndodhi kështu, sepse gjirokastritët pretendojnë se janë ndëshkuar nga gjyqtari me kartonë e jo vetëm kaq, por janë frenuar në aksionet e tyre sulmuese nga ndihmësit e kryesorit Ziri.
Pati shumë reagime ndaj tij, por të paktën publiku u soll shumë korrekt dhe kjo e mbylli ndeshjen pa asnjë incident dhe me fitoren e Lushnjës. Të ashpër në reagimet e tyre për vendimet e gjyqtarit kanë qenë drejtuesit e Luftëtarit, sidomos presidenti Bime, sipas të cilit ka pasur një akord mes gjyqtarëve dhe vëzhguesit Sazan Veleçani për t’i dhënë fitoren Lushnjës. E megjithatë përtej këtij mllefi të Luftëtarit ndaj gjyqtarëve, Lushnja sot është kryesuese pas trepikëshit në Gjirokastër.
Luftëtari – Lushnja 0-1
Shënues: Canka 7’(11-m.)
Luftëtari: Thano, Rexha, Brahimi, Zholi, Dosti, Shena, Braho (Lluka 12’), Çaço, Duka, Tahirllari (Endri Mersini 80’), Frashëri. Trajner:B. Devolli.
Lushnja: Spaho, Sula, Bizhyti, Ndoni, Bakiasi, Gjyla, Gjoni, Baze (Sulo 82’), Topi, Allkanjari (Dervishi 79’), Canka (Musaku 90’+3). Trajner: A. Bano
Gjyqtarë: B. Ziri, E. Veseli, Sh. Ziri (Fushë-Krujë).
Kartonë të verdhë: Lluka, Endri Mersini, Braho, Çaço / Bakiasi, Bizhyti, Topi
Karton i kuq: Lluka
