ASNN – Natyrisht që gjatë fazës përgatitore dimërore apo edhe verore janë të zakonshme ndeshjet e shpeshta miqësore, por Bylisi duket se po vendos një rekord të ri, që i përngjan atij të kampiones së Evropës dhe të botës, Liverpulit, duke luajtur dy takime brenda vetëm 24 orësh.
E teksa skuadra e trajnerit Jurgen Klop, e cila ishte e përqendruar në Botërorin e Klubeve në Katar, do të fuste në fushë më 17 dhjetor 2019 një skuadër rezervë që do të mundej 0-5 në Kupën e Ligës Angleze përballë Aston Vilës, ndërsa 22 orë më vonë e disa qindra kilometra më larg do të përballet me Monterrein në gjysmëfinale të turneut arab, e njëjta gjë po ndodh edhe skuadrën ballshiote.
Kështu, të mërkurën, ballshiotët lanë pas barazimin e 3 ditëve më parë me Apoloninë 2-2 në Fier dhe nuk e patën aspak të vështirë të mposhtnin ekipin e Albpetrolit, që militon në Kategorinë e Dytë të Kampionatit Kombëtar të Futbollit, duke fituar me shifrat e thella 4-1.
Ndërkohë, të enjten, Bylisi do të mbyllë përgatitjet për rinisjen e kampionatit teksa do të përballet me Vllazninë, një takim që do të përcaktojë forcën e vërtetë të mallakastriotëve, që synojnë të marrin pjesë në veprimtaritë evropiane për sezonin e ardhshëm, edhe pse vetëm këtë sezon janë rikthyer në Kategorinë Superiore.
