ASNN – Shkumbini ka bërë një tjetër hap fals në kampionat, kësaj here në shtëpi, teksa është mundur në shifrat 1-3 nga Bylisi. Fillimisht loja ka nisur e qetë për të dyja kampet, të cilat mundohen më shumë që të studiojnë lojën e njëra-tjetrës. Madje kërkojnë të zënë në befasi njëri-tjetrin. Mirëpo, me kalimin e minutave Bylisi shfaqet rrezikshëm dhe në minutën e 21-të kalon në epërsi me anë të Gjonbratit, i cili përfiton siç duhet nga një goditje këndi.
Kroson në zonë Shehaj dhe me kokë Gjonbrati godet duke e dërguar topin në rrjetë. Peqinasit tronditen, pasi nuk e prisnin që të gjendeshin në disavantazh. Fraksioni i dytë i lojës do të niste si i pari, me të dyja kampet që përpiqen të mbajnë larg zonës njëra-tjetërn, por do të jenë sërish miqtë ata që do të gjejnë rrugën e rrjetës, duke dyfishuar shifrat. Hoxhaj bën një kalim të bukur nga krahu i djathtë i sulmit ballshiot dhe gjendet i vetëm me portierin Ajazi.
Ky i fundit e ka të pamundur të bëjë diçka për të mos lejuar prekjen e rrjetës për së dyti herë. Minuta e 68-të dhe Bylisi bën të “heshtë” Peqinin. Nuk kalojnë as dy minuta me Shkumbinin të tronditur dhe Bylisi shënon të tretin me anë të Sakos, pas një krosimi në zonë. 0-3 dhe Shkumbini bie në “tapet”. Në fund peqinasit kanë kohë për të realizuar golin e nderit, me anë të një 11-metërshi të fituar nga Magani, pasi goditja e tij u prek me dorë në zonë nga lojtarët mallkastriotë.
Godet Lluca dhe shënon dhe përfundimisht 1-3 për Bylisin.
Shkumbini – Bylis 1-3
Shënues: Lluca 85′(11-m.) / Gjonbrati 21′, Hoxhaj 68′, Sako 70′
Shkumbini: Ajazi, Lundraxhiu (Turhani 67’), Xhyra, Sulkja, Kafazi, E. Magani, Nexha (Meta 64’), Kuçi (Sopjani 64’), Isai, Lluca, Dervishi. Trajner: L. Pashja
Bylisi: Kaloshi, Kuçi, Gjonbrataj, Aliaj, Bualli, Sako, Metaj, Shehaj (Mustafaraj 88’), Gega, Çaushaj (Prifti 76’), Hoxhaj (Dervishi 82’). Trajner: R. Nenaj
Gjyqtarë: E. Hamiti, P. Simoni, E. Burgu (Lezhë)
Kartonë të verdhë: Hoxhaj, Kuçi, Gega
