ASNN – Dorëzon letrën e garancisë në UEFA, por ende pezull fati i 11 qyteteve të tjera. Sipas medieve ndërkombëtare, Rumania ka konfirmuar së fundmi se kryeqyteti i saj, Bukureshti, mbetet i gatshëm për të organizuar ndeshje të Kampionatit Evropianit të futbollit, që është shtyrë për vitin e ardhshëm. Rumania këtë e ka bërë duke dërguar letër garancie në UEFA, ka njoftuar ministria e sportit të Rumanisë. Të hënën, organizmi që qeveris futbollin evropian, e ka shtyrë mbledhjen e Komitetit Ekzekutiv, të parashikuar për t’u mbajtur më 27 maj, për shkak të disa çështjeve të pazgjidhura “lidhur me numrin e vogël të vendeve të propozuara” për turneun.
Takimi do të mbahet më 17 qershor. “Federata e Futbollit të Rumanisë dorëzoi në UEFA letrën e fundit të garancisë për të rikonfirmuar se është në dispozicion për të organizuar ndeshje të Evropianit të futbollit”, thuhet në një komunikatë të ministrisë, e cila vijon: “Kështu Rumania zyrtarisht rikonfirmon përkushtimin e saj për të organizuar këtë ngjarje të madhe sportive”. Euro 2020 duhet të luhet në 12 qytete përgjatë kontinentit. Por veprimtaria madhore kontinentale është shtyrë për vitin e ardhshëm për shkak të epidemis së virusit korona.
Turneu kontinental zakonisht është organizuar nga një apo dy vende mikpritëse, por UEFA pati vendosur për shumë qytete e shtete për të festuar 60-vjetorin e Evropianit. Amsterdami, Bakuja, Bilbao, Budapesti, Kopenhaga, Dublini, Gllasgou, Londra, Mynihu, Roma dhe Shën Pjetërburgu janë 11 qytetet tjera ku është dashur të organizohet Evropiani këtë vit. Arena Nacionale në Bukuresht do të mirëpres 3 ndeshje të grupit C dhe një ndeshje të turit të 16-shes.
