ASNN – Nejmari duket se po e merr veten mjaft mirë. Ylli brazilian është duke zhvilluar seancat stërvitore në Teresopolis, afër Rio de Zhaneiros, së bashku me skuadrën në prag të Botërorit “Rusi 2018”. “Se deri në ç’masë është rikuperuar Nejmar? A është rikuperuar plotësisht ai? Ajo që mund të them sot është se ecuria e tij është pozitive dhe është më mirë se s pritej” – ka thënë Fabio Mahserezhan, përgatitësi fizik i lojtarit.

Ai është shumë optimist për rikuperimin e plotë të sulmuesit brazilian, madje mjaft i kënaqur me aq sa ka parë gjatë seancave të para stërvitore. Ndërsa mjeku i kombëtares braziliane, Rodrigo Lasmar, i cili udhëhoqi operacionin të cilit Nejmari iu nënshtrua në mars, tha se “ai po i rikthehet lëvizjeve të tij të zakonshme dalëngadalë”.

“Hapi tjetër është trajnimi i plotë me grupin dhe më pas rikthimi në lojë, – ka vijuar mjeku i 5 herë kampionëve të botës. – Shans i mirë për të do të jenë dy miqësoret, me Kroacinë, më 3 qershor, dhe Austrinë, më 10 qershor 2018”. Ndërkohë, Dagllas Kosta ka pësuar një dëmtim të vogël muskulor, dhe sipas Lasmarit, mund t’i humbasë dy miqësoret.