ASNN – Sep Blateri dhe Mishel Platini nuk do të jenë pjesë e futbollit për 8 vitet e ardhshëm. Dy drejtuesit e lartë janë pezulluar pas vendimit të Komitetit të Etikës në FIFA-s, që më parë i kishte ndaluar të kryenin çdo aktivitet për 90 ditë. Pagesa prej 2 milionë dollarësh e kryer nga Blateri në llogari të Platinisë është cilësuar e parregullt. Ky vendim praktikisht i jep fund dilemës për mundësinë e kandimit të Mishel Platinisë për president të FIFA-s në Kongresin e Jashtëzakonshëm Zgjedhor, që do të mbahet në fund të muajit shkurt të vitit të ardhshëm.
Menjëherë pas publikimit të masës së ndëshkimit Platini tha se kjo ishte vendosur muaj më parë, ndërsa është mbështetur nga UEFA, që doli në një deklaratë për mediat. Kurse Sep Blater tha në një konferencë për shtyp se ishte i zhgënjyer nga mënyra se si u trajtua dhe provat e paraqitura. Ai sqaroi se do të vijojë të luftojë për të vendosur të drejtën në vend. Futbolli ndërkombëtar dhe veçanërisht FIFA është përfshirë në një skandal, që shpërtheu në muajin maj me arrestime për korrupsion të zyrtarëve dhe ish-zyrtarëve të saj, duke sjellë edhe dorëheqjen e Blaterit pak ditës pas rizgjedhjes.
Kështu, ka ardhur një pezullim i gjatë për dy figurat kryesore. Presidenti i FIFA-s, Sep Blater, dhe presidenti i UEFA-s, Mishel Platini, janë dënuar me 8 vjet pezullim pikërisht nga FIFA. Vendimi, i marrë nga Komisioni i Etikës në FIFA, i jep fund praktikisht karrierës së gjatë të Blaterit, që ishte zgjedhur president që nga viti 1998. Zvicerani 79-vjeçar deklaroi se do të jepte dorëheqjen në zgjedhjet e reja të FIFA-s, që do të mbahen në muajin shkurt të vitit të ardhshëm, pas skandalit të korrupsionit që shpërtheu disa muaj më parë.
Ndërsa Platini ishte anëtar i Komitetit Ekzekutiv të FIFA-s, dhe synonte të kandidonte për t’u bërë president i FIFA-s, por tashmë edhe ambiciet e tij duket se kanë marrë fund. Në krye të UEFA-s që prej vitit 2007, francezi 60-vjeçar shikohej gjerësisht si pasardhësi më i mundshëm i Blaterit. Hetimi ndaj tyre nisi për shkak të një shume prej 2 milionë eurosh që dyshohet se Blater ia dha Platinisë në mënyrë të paligjshme. Numri një i FIFA-s besohet se mund të ketë edhe telashe të tjera nga hetimi i drejtësisë amerikane, por edhe i organeve të tjera gjyqësore.
Këto hetime kanë çuar në pranga shumë zyrtarë të lartë të organizmit që qeveris futbollin botëror. Fillimisht, dyshja drejtuese ishte pezulluar për 90 ditë nga Komisioni i Etikës, duke dalë të humbur edhe pas apelimit të këtij vendimi. Me shumë gjasa, merr fund karriera tepër e gjatë e Sep Blaterit, por edhe ajo e shkëlqyer e Mishel Platinisë, që pasi ishte një futbollist i madh, provoi të bëhej edhe një drejtues po kaq i madh, por jo për shumë kohë.
