Kundërshtimi i Bezhanit: Merrni masat që të përfaqësohemi denjësisht në këto Lojëra. Akuza e presidentit të Komitetit Olimpik Kombëtar Shqiptar, Viron Bezhani, se Sekretari i Përgjithshëm i Ministrisë së Arsimit dhe Sportit, Plarent Ndreca, është duke penguar ecjen përpara të sportistëve dhe sportit e ka pasur një bazë. Kjo akuzë është bërë gjatë punimeve të Asamblesë së 18-të të Përgjithshme të Komitetit Olimpik Kombëtar Shqiptar, e cila u zhvillua më 17 mars në mjediset e hotel “Bleartit”.

Siç bën të ditur Komiteti Olimpik Kombëtar Shqiptar, sekretari i përgjithshëm i Ministrisë së Arsimit dhe Sportit, Plarent Ndreca, me një shkresë të datës 24 shkurt 2015 ka lajmëruar Federatat se pjesëmarrjen e tyre në Lojërat e para olimpike Evropiane në Bakú duhet ta përballojnë nga granti i tyre. Më saktë në këtë dokument, i cili ka dhe një numër protokolli 753/1, thuhet si vijon:

“Në përgjigje të shkresës suaj nr.32, datë 28 janar 2015, “Pjesëmarrja e Shqipërisë në Lojërat Olimpike Evropiane në Bakú, në zbatim të Ligjit nr.9376, datë 21 prill 2005 për Ligjin për Sportin, i ndryshuar në Ligjin Nr.9936 datë 26 qershor 2008 “Për menaxhimin e sistemit buxhetor në Republikën e Shqipërisë”, të ligjit nr.160/2014, datë 27 nëntor 2014 “Për mënyën e përdorimit të fondit grant/transfertë korrekte e brendshme” për Federatat Sportive dhe Komitetin Olimpik Kombëtar Shqiptar, MAS ka bërë shpërndarjen e fondit grant për vitin 2015 për Federatat Kombëtare Sportive. Për organizimin e aktiviteteve sportive të vitit 2015, bazuar në legjislacionin e cituar më lart, me buxhetin e miratuar për vitin 2015, Federatat Kombëtare Shqiptare Sportive miratojnë planin e kostuar të aktiviteteve sipas kalendarëve sportivë përkatës. Për sa më sipër për të bërë të mundur pjesëmarrjen e sportistëve në Lojërat e para olimpike Evropiane në Bakú është detyrim dhe funksion i Federatave Kombëtare Shqiptare Sportive për disiplinat në të cilat do të marrin pjesë që të planifikojnë dhe të mbulojnë shpenzimet për pjesëmarrjen e sportistëve të tyre. Kurse KOKSH ka rol koordinues.”