Yjet e trajnerëve, që vijnë nëpërmjet specializimit të tyre në kurse kualifikimi, kanë shkaktuar një zallamahi të vërtetë në Asamblenë Vjetore të Federatës Shqiptare të Boksit. Presidenti Kalivopulli ka pranuar që në këtë kurs kualifikimi do të shkojnë Sead Bushati dhe Jonid Nano, sepse janë trajnerë të perspektivës dhe mbi të gjitha komunikojnë në anglisht, që është kërkesa themelore e çdo kursi kualifikimi.

Mirëpo këtu ka ardhur dhe kundërshtimi, sepse si Skënder Kurti, ashtu dhe Gëzim Zeneli e kanë quajtur fyerje për të gjithë vitet që ata kanë në boksin shqiptar. “E megjithatë, – ka thënë kreu i organizmit që qeveris boksin shqiptar, – do të keni mundësinë që gjatë Memorial Vllaznia të merrni yjet e juaja, sepse do të ketë një kurs kualifikimi me trajner të huaj.”

“Por ende edhe sot ne nuk kemi një përgjigje nga Bushati dhe Nano, sepse janë kurse me paratë e tyre të xhepit”, – ka shtuar Kalivopulli. Duhet theksuar se, ashtu sikurse në Asamblenë Vjetore të Mundjes, edhe në të boksit kanë munguar përfaqësuesit e Ministrisë së Arsimit dhe Sportit dhe të Komitetit Olimpik Kombëtar Shqiptar. Edhe pse shkresërisht ata ishin lajmëruar për një mbledhje të tillë.

Të paktën kështu ka deklaruar drejtori teknik i Federatës Shqiptare të Boksit, Migen Pero. Por fakti është që edhe tek boksi as MAS-i e as KOKSH-i nuk ishin të pranishëm.