ASNN – Të mërkurën ka ardhur një tjetër goditje e rëndë për sportin shqiptar që kohët e fundit ka pasur raste të shpeshta të përdorimit të substancave të ndaluara veçanërisht në sportin e peshëngritjes. Këtë radhë është një boksier, pjesë e delegacionit shqiptar në Lojërat Evropiane “Baku 2015” është përjashtuar, pasi ka dalë pozitiv në kontrollin antidoping. 19-vjeçari Rexhildo Zeneli nuk e ka kaluar me sukses testin e urinës të kryer më 13 qershor.
Rexhildo Zeneli është sportisti i parë që ka rezultuar me doping në Lojërat e para Olimpike Evropiane që po zhvillohen në kryeqytetin e Azerbajxhanit, Bakù. Boksieri i në kategorinë e peshës trupore deri në 56 kilogramë ka dalë pozitiv pas kontrollit “jashtë gare”, të kryer nga Komiteti Olimpik Evropian. Më 13 qershor, 19-vjeçari ka bërë testin e urinës, ku ka rezultuar pozitiv me substancën “Furosemide”.
Sipas deklaratës zyrtare të Komitetit Olimpik Kombëtar Shqiptar, “Misioni i Ekipit Shqiptar është njoftuar zyrtarisht me anë të e-mailit nga Komisioni Antidoping dhe Mjekësor “Baku 2015” me rezultatet e testit doping të sportistit Rexhildo Zeneli i cili një ditë pas mbërritjes në fshat në datën 13.06.2015 i është nënshtruar një kontrolli doping. Boksieri Zeneli, i cili do të garonte në kategorinë 56 kg, ka rezultuar me përdorim të substancave të ndaluara nga lista e WADA-s.”
“Substancat e ndaluara janë Diuretics (lasiks). Sportisti ka pranuar në prezencë të Komisionit Anti doping dhe Disiplinës se ka përdorur produktin “lasiks” për të rënë nga pesha. Sipas rregullores Antidoping në këto lojëra, sportistit në mënyrë automatike i hiqet e drejta të vazhdojë garën si dhe duhet të lërë fshatin e sportistëve”, – përfundon deklarata e KOKSH-it. Shqipëria në Lojërat Evropiane nuk ka arritur asnjë sukses në garat e zhvilluara deri tani.
