Sekretari Kabashi: “Kjo veprimtari do të jetë testimi më i mirë për boksierët tanë, të cilët do të marrin pjesë në garat kualifikuese të Lojërave Olimpike “Rio de Zhaneiro 2016””. “Memorial Vllaznia”, që do të zhvillohet në Shkodër, nga data 11, deri më 14 mars 2016, e ka angazhuar maksimalisht Federatën Shqiptare të Boksit.

Prej vitesh është një veprimtari që ndodhet në kalendarët e Federatës Evropiane dhe Botërore të Boksit, ndaj dhe angazhimi është maksimal, jo vetëm në organizim, por dhe në përzgjedhjen e boksierëve shqiptarë. Sipas sekretarit të përgjithshëm të Federatës Shqiptare të Boksit, Edmond Kabashi, do të jenë pjesëmarrës rreth 70 boksierë.

“Deri më tani, – thotë Kabashi, – kanë konfirmuar pjesëmarrjen Ukraina, Kazakistani, Bullgaria, Kosova, Maqedonia. Jemi në pritje të konfirmimit të Greqisë, Italisë dhe Gjermanisë. Për ne, si kombëtare e Shqipërisë, do të jetë një testim i mirë për të gjithë ato boksier që do të marrin pjesë në garat kualifikuese të “Rio de Zhaneiro 2016”.”

“Bëhet fjalë për në prill në Turqi dhe në qershor në Azerbajxhan, – ka vijuar nr. 2 i organizmit që qeveris boksin shqiptare. – Për një përgatitje më të mirë boksierët do të shkojnë madje edhe për një muaj përgatitje në Azerbajxhan dhe një muaj tjetër në Bullgari ose Ukrainë.”

“E gjithë ideja është pjesëmarrja e mirë në “Memorial Vllaznia 2016”, por më pas dhe në garat kualifikuese, ku ne pretendojmë që të kemi të kualifikuar me normë në Lojërat Olimpike”, – ka përfunduar Sekretari i Përgjithshëm i Federatës Shqiptare të Boksit, Edmond Kabashi.