7.500.000 lekë është “grant”-i i Federatës Shqiptare të Boksit për vitin 2016, ndërsa presidenti Florend Kalivopuli ka pranuar që është i pamjaftueshëm. E megjithatë në biseda miqësore që drejtuesit e Federatës Shqiptare të Boksit kanë pasur me Ministrinë e Arsimit dhe Sportit ka një shans për një rritje me 1.500.000 lekë të rinj, që “grant”-i i boksit të shkojë të paktën atje ku ka qenë. Por mbi bazën e këtij “grant”-i janë parashikuar dhe veprimtaritë kombëtare e ndërkombëtare, që edhe ato kanë shkaktuar debate.
“Së pari ne kemi një turne në Bullgari më 22 shkurt 2016, në të cilin do të marrin pjesë Klevis Vrapi, Krenar Zeneli, Alban Beqiri, Arnold Kajoshi dhe Suad Marinaj, – ka sqaruar Kalivopuli. – Ata do të sponsorizohen nga unë dhe zëvendëspresidenti Mirsad Uruçi në shumën prej 3000 eurosh”. Por këtu ka kundërshtuar si Baftjar Abazi, që ka kërkuar një funksion më të mirë të Këshillit të Trajnerëve, ashtu dhe nga trajneri i Tiranës, Skënder Kurti. Emrat e Taulant Zajmit, Albi Sorrës, Denis Nurjes, Aleksandër Ramës, Alban Beqirit, Arnold Kuqarit kanë dalë në diskutim për faktin se përse nuk janë thirrur.
Madje duke i shtuar këtu dhe faktin se duhet të ketë “sparingje” për përcaktimin e sportistëve më të mirë. Megjithatë është rënë dakord të paktën që për “Memorial Vllaznia” të ketë një kombëtare me “5+1”, duke pranuar edhe dublimin e peshave. “Hajdeni të hënën në Shkodër të bëjmë “sparingun”, pse jo dhe përpara “Memorial Vllaznia””, ka propozuar trajneri Zef Gjoni, sikurse presidenti Kalivopuli ka pranuar që Memorial Vllaznia është aktiviteti më i mirë i organizuar në Ballkan. Ajo që ka hapur diskutim ka qenë kampionati i shkollorëve dhe paratërinjve në Kukës, kërkuar nga Kryetari i Bashkisë së këtij qyteti.
Dikush ka propozuar Fierin e dikush tjetër një qytet tjetër. “Deri të premten ne presim kërkesat tuaja për veprimtaritë kombëtare, – ka deklaruar kreu i organizmit që qeveris ringun shqiptar. – Ideja ime meqë jemi në 25-vjetorin e Federatës është të bëjmë të rinjtë, fazën e parë eliminatore të kampionatit. Në mes të fusim Kupën e Shqipërisë, sepse kështu i detyrojmë sportistët që të marrin pjesë. Në të kundërt nuk marrin shpërblimin si fitues. Dhe pastaj dhjetë finalet në një mbrëmje Gala në Tiranë”.
Ky ka qenë propozimi i Kalivopulit, i cili ka deklaruar se do të bëhen të gjitha aktivitetet ndërkombëtare, shto këtu dhe turnetë kualifikues të Lojërave Olimpike “Rio de Zhaneiro 2016”. “Sepse nuk mund t’i privojmë sportistët nga mundësia për të konkurruar dhe po patëm fat të kemi ndonjërin me normë kualifikimi në Rio”, – ka përfunduar Kalivopuli.
