ASNN – Në kuadër të pasurimit të jetës përgjatë sezonit veror, në qytetin bregdetar të Vlorës, është zhvilluar një kampionat bilardoje. Në këtë kampionat morën pjesë 8 sportistët më të mirë të kësaj disipline nga Vlora, të cilët u ndeshën me njëri-tjetrin përgjatë dy ditëve, në mjedisin e krijuar posaçërisht në shëtitoren në Skelë.

Ndeshjet e kësaj veprimtarie sportivo-turistike tërhoqën vëmendjen e shumë pushuesve dhe sportdashësve të kësaj disipline, ndërsa spikati niveli i lartë i lojës që u dhurua nga sportistët pjesëmarrës. Në përfundim të kësaj veprimtarie, fitues i saj u shpall bilardisti i talentuar vlonjat, Besmir Cufe.

Trofeu fituesit iu dorëzua nga kryetari i ri i Bashkisë së Vlorës, Dritan Leli, i cili premtoi mbështetje të vazhdueshme për sportin e këtij qyteti në të gjitha disiplinat. Leli vlerësoi gjithashtu se veprimtari të tilla, që nxitin edhe turizmin, do të jenë edhe më të shumta, sidomos gjatë stinës së verës.