ASNN – Duke nisur nga 31 maji, e deri më 11 qershor 2017, po zhvillohet në Shëngjin Kampionati Evropian i disiplina e bilardos që njihet si “snooker”. Në këtë Kampionat po konkurrohet në 4 kategori të kësaj disipline, në atë të 6 të kuqeve, në atë “të hapur”, në atë ekipore (Femrat, Meshkujt dhe Mjeshtrat) dhe në atë individuale (Femrat dhe Mjeshtrat).
Në turneun e 6 të kuqeve, që u zhvillua përgjatë 3 ditëve në vijim, marrin pjesë 64 sportistë nga 12 vende të ndryshme të kontinentit. Sikundër çdo veprimtari madhore sportive, kombëtare apo ndërkombëtare, edhe të gjitha ndeshjet e këtij Kampionati Evropian të Snooker-it po vijnë për sportdashësit drejtpërdrejt në Rrjetin e Radio-Televizionit Shqiptar, në kanalin RTSH Sport.
Kategoria e 6 të kuqeve u dominua nga britanikët dhe nordikët dhe në gjysmëfinale, që u zhvilluan të premten, islandezi Kristjan Helgason triumfoi me shifrat 4-2 ndaj uellsianit Aleks Tobman, në njërin çift, kurse në çiftin tjetër, anglezi Uejn Braun mundi me të njëjta shifra uellsianin Tajler Riis. Ndërkaq, në duelin final, islandezi Helgason ka ruajtur gjakftohtësinë, duke mundur me shifrat 5-2 anglezin Braun dhe duke u shpallur “kampion” i Evropës.
Ndërkohë, kanë nisur ndeshjet e kategorisë së hapur. Në kategorinë ekipore janë regjistruar dy lojtarë për çdo skuadër, si për meshkuj, ashtu edhe për femra, por edhe për mjeshtrat. Ndërkohë, për mjeshtrat, që duhet të jenë mbi 40 vjeç në ditën e garës, skuadrat përbëhen nga maksimumi 4 lojtarë për çdo skuadër, si për femra, ashtu edhe për meshkuj.
Janë gjithsej 34 gjyqtarë ndërkombëtarë që do të gjykojnë në këtë këtë Kampionat Evropian. Pas përfundimit të kategorisë së hapur, më 4 qershor do të mbahet ceremonia e hapjes, duke vijuar nga data 5, deri më 8 qershor, me garat e Kampionatit Individual dhe atij Ekipor, që do t’i luajnë finalet përkatësisht më 10 dhe 11 qershor 2017.
