ASNN – Ndërkohë tek Besëlidhja, kapiteni Mirsad Gruda tashmë është kthyer në formën e tij optimale dhe deri më tani ka punuar me shumë pasion për të zënë vendin e titullarit në formacion lezhjan. Ai duhet të jetë një organizator i vërtetë i Besëlidhjes, por dhe një dirigjent për ta çuar skuadrën drejt ngjitjes në Kategorinë Superiore. Duke folur për gazetat sportive të ditës, Gruda do të nënvizonte faktin se është duke përfituar shumë nga ndërprerja e kampionatit. “Do ta shfrytëzojmë në maksimum këtë periudhë për të qenë sa më gati për ndeshjen e së shtunës së ardhshme me Veleçikun”, – ka thënë ai.
“Do të djersijmë sa më shumë në stërvitje me qëllim që ta bëjmë më të lehtë punën tonë në ndeshjet e kampionatit, – ka vijuar kapiteni lezhjan. – Duhet të zbatojmë të gjitha kërkesat taktike të trajnerit, sepse vetëm ato do të mund të na çojnë përpara në realizimin e objektivit. Duke e vlerësuar stërvitjen si një ndeshje, atëherë do të vijnë dhe frytet e duhura nga puna jonë. Po përpiqemi të përdorim një lojë shumë ofensive, e cila duhet të jetë dhe konkrete në ndeshjet e ardhshme. Po përgatitemi për ndeshjen me Veleçikun, e cila është një ndeshje e vështirë.”
“Kjo, sepse kemi të bëjmë me një kundërshtar që luan një futboll të mirë,- ka vijuar pinjolli i një familjeje të njohur të qytetit veriperëndimor. – Jo më kot janë në të njëjtën kuotë pikësh sa ne. Por ne duhet të bëjmë ç’është e mundur për ta fituar këtë sfidë dhe për të qenë ne kryesuesit e vetëm të Grupit të Veriut. Do të luajmë në fushën tonë, përpara publikut tonë, i cili do të na ndihmojë për ta nxjerrë me sukses këtë sfidë me koplikasit. Një fitore me Veleçikun na vendos në kryer të grupit dhe na shton më shumë dëshirën për t’u ngjitur në Superiore.”
“Dhe përgjegjësia do të jetë më e madhe për të ruajtur kryesimin e paprekur bëhet më e madhe. E kemi nisur mirë kampionatin, ndërsa ecim me shprehjen: Një fillim i mirë është gjysma e punës. Dhe besoj se kjo fjalë do të zbatohet në Shkodër”, – ka përfunduar kapiteni i Besëlidhjes, Mirsad Gruda.
