Ndihmëstrajneri Bilali: “Në këto Eliminatore do të kemi 15 basketbollistë, presim rikuperimin e Biberajt dhe Fasllisë dhe mund të kemi ndryshime. Por ky është grupi që do të përballojë Eliminatoret”. Kombëtarja e basketbollit të meshkujve, që drejtohet nga Antonis Kostantinides, sot do të niset drejt Qipros, atje ku nga data 17, deri më 24 gusht 2016, do të marrë pjesë në një turne miqësor.
Do të ketë përballë Qipron, Estoninë dhe Katarin. E përkrah Presidentit të Federatës Shqiptare të Basketbollit, Avni Ponari, dhe Sekretarit të Përgjithshëm Korab Llazani, kanë qenë mbrëmë përpara mediave ndihmëstrajneri Afrim Bilali dhe kapiteni i kuqezinjve, Gerti Shima. Ka munguar trajneri Kostantinides, i cili është nisur një ditë përpara për në Qipro.
Presidenti i Federatës Shqiptare të Basketbollit, Avni Ponari, pasi i ka uruar suksese ekipit kombëtar jo vetëm në Qipro, por dhe në Eliminatoret e Kampionatit Evropian 2017, ka pohuar: “Nesër (sot) niseni për në Qipro për një turne miqësor të rëndësishëm në përballjen me skuadrën vendëse, Estoninë dhe Katarin. Unë ju uroj suksese, ashtu sikurse të njëjtën gjë do të keni dhe në 23 në Estoni.”
“Ftoj Bilalin dhe Shimën për të folur më shumë, por ajo që uroj është një pallat i mbushur plot më 3 shtator ndaj Malit të Zi kuptohet për të arritur një rezultat të mirë”, – ka përfunduar kreu i organizmit që qeveris basketbollin shqiptar, Avni Ponari.
