Federata Shqiptare e Basketbollit ka lajmëruar se të shtunën në ora 12:00, në mjediset e saj, do të hedhë shortin e kampionatit të koshit për meshkuj dhe femra, Kategoria Superiore, për sezonin 2014-2015. Por përpara këtij shorti, i cili do të jetë në ora 12:00 të shtunën, do të mblidhet kryesia e Federatës Shqiptare të Basketbollit.

Siç është vendosur dhe më 29 shtator, klubet dhe shoqatat anëtare të Federatës Shqiptare të Basketbollit kanë afat deri më sot për të dorëzuar të gjithë dokumentacionin e duhur të pjesëmarrjes në kampionat, si dhe do të duhet të plotësojnë detyrimet financiare.

Pikërisht të shtunën, disa orë përpara hedhjes së shortit, kryesia e Federatës Shqiptare të Basketbollit, gjithnjë mbi bazën e plotësimit të dokumentacionit nga klubet dhe shoqatat, do të miratojë dhe skuadrat pjesëmarrëse në kampionat. Më pas do të jetë dhe hedhja e shortit, kurse kampionati i basketbollit do të nisë më 17 tetor.