Në fakt ndeshja Ardhmëria Basket-Tirana Eagles nuk u ka shpëtuar problemeve. Së pari gjithçka ka nisur nga tabela, atje ku përdoruesit kanë pasur vështirësi në dhënie zgjidhje. Madje në pjesën e dytë për shkak të një butoni të shtypur gabim nga 8 minuta e 32 sekonda ka shkuar në 5 minuta. Dhe vetëm ndërhyrja e trajnerit Bilali, por dhe gjyqtarëve ka stabilizuar gjërat, që në pjesën e tretë dhe të katërt kanë qenë normale.

Ndërkohë ajo që është bërë shqetësim ka qenë luhatja e tensionit, çka e ka bërë pamjen dhe ndriçimin jo normal. Për këtë arsye ndeshja është ndërprerë dy herë, në pjesën e parë në rezultatin 12-7 për Ardhmërinë dhe në të dytën në epërsinë 26-16 për skuadrën e Bilalit. Dhe në pjesën e 3-të, gjyqtari Kasëmi ka ndëshkuar me gabim teknik Çaçin e Eagles dhe Ferrën e Ardhmërisë për debate e përplasje me fjalë mes tyre.

Madje Ferrën e ka shkundur mirë trajneri Bilali, ndërsa më pas lojtari ka hyrë në “binarët” e duhur. Përfundimisht një fitore e lehtë e Ardhmërisë, por që ka pasur një mori problemesh, që më së shumti kanë qenë të lidhura me organizimin e zhvillimit të ndeshjes. Sepse defektet në përdorimin e tabelës dhe luhatjet e tensionit janë kthyer në “gangrenë” duke e zgjatur ndeshjen më shumë se sa normalja.