ASNN – SIGAL Prishtina do të mundohet të bëhet skuadra e dytë në histori të Ligës Ballkanike, që e ngre lart trofeun dy herë radhazi. Ekipet e vetme që e kanë fituar këtë trofe dy herë janë Galil Galboa dhe Levski i Sofies, por vetëm ekipi izraelit arriti këtë për dy vjet radhazi.

Tashmë, bardhekaltrit janë në kërkim të një vendi në librat e historisë së BIBL-së si ekipi i dytë me dy tituj radhazi. Faqja zyrtare në Internet e Ligës Ballkanike i ka kushtuar një shkrim të veçantë kampiones kosovare, për të cilin shkruan se i ka mundësitë e mira që ta mbrojë titullin, pasi ka regjistruar 10 fitore radhazi.

Nga totali i 14 ndeshjeve, SIGAL Prishtina i ka humbur vetëm dy, ndërsa nuk ka asnjë humbje në BIBL gjatë vitit 2016. Gjatë sezonit, skuadra kryeqytetase bëri shumë ndryshime në skuadër, ndërsa emëroi gjithashtu edhe trajnerin e ri. Kampionët në fuqi e bënë praktikisht të njëjtën gjë edhe sezonin e kaluar dhe ky doli të ishte vendimi i duhur.

I njëjti skenar duket se po përsëritet edhe këtë edicion, por duhet të pritet zhvillimi i dy ndeshjeve finale. Pas fillimit të dobët të sezonit, SIGAL Prishtina shfaqi shenja përmirësimi pasi e mundi Mornarin 86-75 në fushë të huaj, në ndeshjen e fundit të fazës së parë të grupeve.

Ky ishte fillimi i fitoreve për kampionët, të cilët më pas i shtuan atij triumfi edhe 9 të tjerë. Sidoqoftë, fitorja më e mirë ishte ajo e javës së tretë të fazës së dytë, kur e mposhtën rivalen kosovare, Pejën, 85-84, në një sfidë dramatike. Kjo fitore ua siguroi kryeqytetasve vendin e parë në grup, pasi më pas e mundën edhe Kozuvin e Levskin, për ta siguruar edhe matematikisht kualifikimin në gjysmëfinale, ku e dominuan Beroen në të dyja ndeshjet.