I ftohti i acartë i Pallateve të Sportit, ndërsa temperaturat nëpër salla kanë shkuar deri në minus 4-5 gradë Celsius, por dhe epidemitë e gripit, shumë nga skuadrat e lojërave me dorë i kanë detyruar që të stërviten në palestra force. Parë kështu, teksa fillimi i kampionatit është lënë për më 3-4 shkurt, trajneri i basketbollit të femrave të Tiranës, Roland Avrami ka bërë një propozim.

“Temperaturat tepër të ulëta dhe situatës epidemike të gripit duhet t’i bëjmë ballë ndryshe, – ka shkruar ai në një postim në rrjetin social, “Facebook”. – Duke qenë të vetëdijshëm që sallat ku zhvillohen stërvitet dhe ndeshjet zyrtare janë në temperatura të ulëta, pa sisteme ngrohje të përshtatshme për to, atëherë dhe aktiviteti kombëtar në këtë periudhë është në pikëpyetje.:

“Ndaj mendoj se kjo situatë do të ndikojë në shëndetin e sportistëve duke rrezikuar dhe trauma të rënda, – ka vijuar trajneri bardheblu. – Ndaj e shoh të arsyeshme të propozoj shtyrjen e fillimit të fazës së dytë në një afat tjetër kohor, sepse gjithçka do të ishte në favor të ruajtjes së shëndetit të sportistëve. Por njëkohësisht do ta bënte dhe më normal zhvillimin e Kampionatit Kombëtar dhe pasqyrimin më me nivel të aktivitetit.”

Tashmë pritet reagimi i Federatës Shqiptare të Basketbollit, që për të tilla arsye shtyu për një javë rifillimin e kampionatit të moshave. Bëhet fjalë për javën e tretë të kampionatit të të rejave dhe të rinjve, që, sipas Sekretarit të Përgjithshëm të Federatës Shqiptare të Basketbollit, Korab Llazani, do të rifillojë të shtunën e ardhshme. “Nuk është vetëm thjesht çështje gripi”, – ka thënë ai një ditë më parë.

“Por sepse në rregullore është që të luhet në dimër në salla që të kenë një temperaturë 16-22 gradë Celsius, – ka vijuar thotë nr. 2 i organizmit që qeveris basketbollin shqiptar. – Gjë që pallatet tona të sportit nuk e përmbushin këtë kriter. Në këto kushte e kemi shtyrë kampionatin e kësaj grupmoshe për të shtunën e ardhshme.”