Shqipëria e Nën-16-vjeçareve në basketboll për të reja nuk ka bërë asnjë ndryshim nga pjesëmarrjet e kombëtareve të tjera të moshave, të cilat jo vetëm janë mundur në Kampionatin Evropian, Divizioni B dhe C, por kanë humbur me epërsi të thellë. Kështu ka ndodhur dhe dje në Ohër, atje ku po zhvillohet Divizioni B për Nën-16-vjeçaret, ndërsa ka pranuar të marrë pjesë dhe Shqipëria. Vajzat kuqezi kanë qenë përballë Zvicrës, e cila e ka vënë ndeshjen që në fillim në zotërim.
E thuhet kështu sepse pjesa e parë është fituar nga zviceranet 32-11. Në koshat e parë tonat janë të suksesshme, sepse ka shënuar Mire dhe është kundërpërgjigjur Zllatiçanin dhe 2-2. Madje për herë të parë dhe të fundit në këtë ndeshje kemi guxuar të dalim dhe në epërsi, teksa ka shënuar përsëri Zllatiçanin. Por vetëm kaq. Zvicra ka barazuar e më pas është gjithnjë në epërsi, derisa ka thelluar 24-4. Për rreth 5 minuta tonat nuk ekzistojnë.
Janë të pasakta në gjuajtje, por të tilla dhe në mbrojtje dhe për rrjedhojë Zvicra gjen shesh e bën përshesh. Vetëm katër minuta nga fundit Shqipëria ka arritur të bëjë disa pikë, ndërsa Zvicra nuk e ul ritmin e në fund të pjesës së parë shënohet rezultati 32-11. Pjesa e dytë është e ekuilibruar, sepse duket që Mitku i ka shkundur. 16-10 për Zvicrën dhe në pushim shkohet me epërsinë e helveteve, 48-21. Epërsi që ka ardhur duke u thelluar në dy pjesët e tjera, atje ku tonat në 20 minuta kanë shënuar vetëm 8 pikë kundrejt 31 pikëve të Zvicrës.
Përfundimi 79-29 për Zvicrën dhe një fillim i Evropianit për tonat me humbje prej 50 pikësh diferencë. Ky ka qenë prezantimi i parë i Shqipërisë në Ohër që është tërësisht për t’u harruar duke shpresuar që në vazhdim do të kemi tjetër imazh. Por që është e vështirë, sepse në fund të fundit ky është niveli i basketbollit shqiptar.
Zvicër – Shqipëri 79-29
(32-11, 16-10, 17-2, 14-6)
Zvicra: Margot (13), D. Miranda Monteiro (13), Has (6), Polite (2), Mire (6) / Vaser, Joki (4), Guibert (4), Margot (6), Gut’hauser (6), Salman (10), MekDauell (9). Trajner: S. Kristofer Tuehues.
Shqipëria: Zllatiçanin (4), Toska (5), Baraj (4), Hasanaj (4), Fekollari (10) / Kraja, Shima, Dalipaj (1), Sinani (1) Trajnere: F. Mitku
Gjyqtarë: E. Kartal (Turqi), A. Fedevski (Maqedoni), V. Gjorgji (Hungari)
