ASNN – Kampionati Kombëtar i Basketbollit për Meshkuj ka luajtur dje dy ndeshjet e tjera të javës së tij të 12-të dhe Tirana e Vllaznia kanë korrur fitore, duke ruajtur duelin e kreut.

Shkodranët e trajnerit Bledar Gjeçaj, të cilët kanë kapërcyer zhgënjimin në Superkupë, ku u mundën nga Kamza Basket, dhe kanë fituar në Durrës ndaj Apolonisë, me shifrat 97-68, tashmë janë ngjitur në kuotën e 21 pikë.

Po aq kanë edhe bardheblutë e Bujar Shehut, të cilët nuk kanë patur shumë probleme në kryeqytet ndaj Flamurtarit, duke triumfuar në shifrat 87-71. Në vendin e 3-të, me 4 pikë më pas është Partizani, që u mund këtë javë.

Kamza Basket jo vetëm që është prezantuar dje si një fituese e denjë e Superkupës së Shqipërisë, por duket se të premten ia ka “nxjerrë inatin” Partizanit të trajnerit Elvis Ismeti.

Ajo që duhet pranuar është se në dy fazat e para Partizani kishte fituar si në Kamëz, 68-63, ashtu dhe në Pallatin e Sportit “Asllan Rusi”, 62-61. Por ajo e të premtes ka qenë një tjetër histori.

Kamza Basket jo vetëm që e ka dominuar ndeshjen, por i ka fituar me diferencë pikësh të katër pjesët e ndeshjes dhe duke vulosur suksesin e tyre në shifrat 76-37 ndaj Partizanit.

Kampionati Kombëtar

i Basketbollit – Meshkuj

Java e 11-të

(30-31 janar 2015)

Të premten:

Kamza Basket – Partizani  76-37

Të shtunën:

Tirana – Flamurtari              87-71

Apolonia – Vllaznia             68-97

Renditja

Nr.       Skuadra                     N.        F.         H.        Psh-Pp           Pikë

1. Vllaznia             11        10        1        947-714         21
2. Tirana             11        10        1        965-734         21
3. Partizani             11        6        5        708-753         17
4. Kamza Basket 11        5        6        798-688         16
5. Flamurtari             11        2        9        727-871         13
6. Apolonia             11        0        11        623-992         11