ASNN – Dueli i mbijetesës midis Vllaznisë dhe Kamza Basket ka rezultuar një ndeshje spektakolare për shkodranët, të cilët korrën një fitore të thellë e mjaft të rëndësishme në rrugëtimin e tyre për të mbetur në Superligën e Meshkujve. Skuadra e Vllaznisë mundi pikërisht Kamza Basketin me rezultatin 105-69, në një takim të dominuar dukshëm prej shkodranëve dhe që me dypikëshin e sotëm afrohen ndjeshëm pikërisht me Kamzën, tani vetëm 1 pikë larg dhe duke e kërcënuar me rënie nga kategoria.

Kjo ishte fitorja e parë e Vllaznisë për vitin 2019, por duket se ka ardhur në momentin e duhur sepse skuadra shkodrane nuk ka më ambicie titulli por mbijetese dhe kjo ambicie varet shumë nga rezultati i dueleve direkte me Kamza Basket. Ka dhe një duel tjetër midis tyre, në fazën e fundit dhe prej atij takimi do të varet dhe fati i skuadrës që do të qëndrojë në Superligë dhe ekipit që bie një kategori më poshtë. Sa i takon ndeshjes, rezultati flet më shumë se gjithçka tjetër.

Pasi epërsia e fitores është me 36 pikë diferencë, shumë e konsiderueshme për dy ekipe që janë afër njëra-tjetrës në fundin e tabelës. Padyshim duelet e kësaj jave janë mjaft interesante, sepse do të ketë dy duele derbi. I pari luhet të shtunën në kryeqytet midis Partizanit dhe Tiranës, një duel që zhvillohet në Pallatin e Sportit “Asllan Rusi” në orën 18:00. Kurse derbi tjetër, është ai i Durrësit, i cili luhet ditën e dielë në orën 18:00 në Pallatin e Sportit “Ramazan Njala” të qytetit bregdetar.

Dy duele që janë vendimtare renditjen, megjithëse titullin e përcakton fazan “play-off” që luhet në përfundim të ndeshjeve të rregullta të kalendarit sezonal.

Kampionati Kombëtar

i Basketbollit – Meshkuj

Superliga

Java e 13-të

Të premten, 22 shkurt 2019:

Vllaznia – Kamza Basket    105-69

Të shtunën, 23 shkurt 2019:

Partizani – Tirana                 ora 18:00

Pallati i Sportit “Asllan Rusi”, Tiranë

Të dielën, 24 shkurt 2019:

Teuta – Goga Basket            ora 18:00

Pallati i Sportit “Ramazan Njala”, Durrës

Renditja

Nr.       Skuadra                     N.        F.         H.        Pikë

1. Goga Basket             12        10          2        22
2. Teuta                          12          9          3        21
3. Partizani                    12          8          4        20
4. Tirana                         12          5          7        17
5. Kamza Basket          13          3        10        16
6. Vllaznia                     13          2        11        15