Një ndeshje pa emocion ishte ajo e luajtur mbrëmë në Pallatin e Sportit “Qazim Dervishi” të Shkodrës mes Vllaznisë dhe Flamurtarit në basketboll për meshkuj. Themi pa emocion pasi në fushë kishte vetëm një skuadër, ajo e Vllaznisë, e cila për asnjë moment nuk pati as më të voglin ngacmim nga kundërshtari. Vetë  humbja e pësuar me 62 pikë diference tregon qartë atë çfarë ka ndodhur në këtë ndeshje.

Përballë një skuadre nën nivelin e saj, skuadra kuqeblu, jo vetëm që përfitoi të fitonte thellësisht, por, në të njëjtën kohë, trajneri Bledar Gjeçaj pati mundësinë të aktivizonte lojtarët e stolit. Epërsia e kuqebluve është parë të jetë e pranishme që në minutat e para të pjesës së parë, ndërsa ka fituar 26-10 dhe këtu ka nisur shkëputja e kuqebluve vendas.

Më vonë duke fituar edhe 3 pjesët e tjera, përkatësisht 24-10, 30-12, 15-13, do të vinin duke u thelluar suksesin, aq sa në fund do të regjistroheshin shifrat 106-44 për Vllazninë. Për trajnerin Gjeçaj, skuadra e të cilit vjen pas humbjes në javën e parë në fushë të huaj me Tiranën, përballja me vlonjatët e Flamurtarit ishte, praktikisht, thjesht një stërvitje.

Në pronocimin e tij të pas ndeshjes për “Sport Ekspres” ai bëri të ditur se javën e ardhshme që do të luajë sërishmi brenda dhe se përballë do të ketë skuadër që duhet pasur në konsideratë, siç është Ardhmëria Basket, e cila në këtë kampionat është forcuar me basketbollistët cilësorë. Sipas tij. Vllaznia do të ketë një paraqitje në rritje dhe se me afrimin e sponsorëve, që për momentin janë larguar, skuadra do të ketë pamje tjetër

Vllaznia – Flamurtari                        106-44

(26-10, 24-10, 30-12, 15-13)

Vllaznia: Bërdica, Ndoja, Shabani, Da. Lekndreu, Do. Lekndreu / Taraboshi, Selimi, Rrashketa, Faslia, Rakaj. Trajner: B. Gjeçaj

Flamurtari: Toska, Sotiri, Kollovi, Nuredini, Gani / Kasimi, Liçaj, Lilaj, Bacaj, Dede. Trajner: V. Birçaj

Gjyqtarë: A. Dulçe, A. Bejko, Y. Harasani (Tiranë)

Kampionati Kombëtar

i Basketbollit – Meshkuj

Superliga

Kalendari i javës së dytë:

(21 tetor 2016)

Të premten:

Vllaznia – Flamurtari                       106-44

Ardhmëria Basket – Teuta                67-73

Kamza Basket – Tirana                     66-86

Renditja

Nr.       Skuadra                     N.        F.         H.        Psh-Pp           Pikë

1. Tirana                         2          2          0          168-131         4
2. Teuta                          2          2          0          161-132         4
3. Vllaznia                     2          1          1          171-126         3
4. Ardhmëria Basket    2          1          1          142-104         3
5. Kamza Basket          2          0          2          131-174         2
6. Flamurtari                  2          0          2            75-181          2