Kampionati i basketbollit do të nisë sot javën e parë të sezonit 2016-2017 dhe kryendeshja do të jetë ajo që do të luhet sonte në “Fahrie Hoti”, në ora 18:00, midis Tiranës dhe Vllaznisë. Bardheblutë, të paktën edhe sipas menaxherit të përgjithshëm të klubit Tirana, Anxhelo Koleka, nuk kanë pushuar asnjë ditë pas fitores në Ligën Ballkanike me Trepça Mitrovica. “Përkundrazi, – thotë Koleka, – që të martën skuadra ka zbritur në parket për të përgatitur sa më mirë këtë ndeshje me Vllazninë.”

“Sepse kërkojmë që ta nisim me fitore sezonin, e cila do të jetë një shtysë dhe për ndeshjen e ardhshme të Ligës Ballkanike, të mërkurën e ardhshme me MKK Feni Industries, – ka vijuar ai. – Përgjithësisht gjendja është e mirë dhe ne besojmë se gjithçka do të shkojë sipas parashikimeve tona”. E për të pasur një impuls më shumë, Tirana ka bërë ftesë për “Fanatiksat”, të cilët, më së shumti, në ndeshjet e basketbollit të meshkujve nuk kanë munguar për asnjë arsye.

“Ne u kemi bërë thirrje, – thotë Koleka, – nëpërmjet profilit tonë në rrjetin social “Facebook”, që të jenë sa më të shumtë dhe i presim në Sallën Sportive “Fahrie Hoti”. E duke mbetur tek Liga Ballkanike, Tirana më së shumti është habitur nga rezultati i Sutjeskës së Nikshiqit, e cila të mërkurën ka fituar në fushën e Karpos Sokolit 2000, me shifrat bindse 94-60. “Në një farë mënyre nuk e prisnim një rezultat të tillë, – ka thënë Koleka.

“E pritshme dhe fitorja e Pejës, por jo në atë diferencë pikësh plus 9 me MKK Feni Industries, – ka vijuar zyrtari i klubit bardheblu. – Megjithatë ne shohim punën tonë dhe kërkojmë suksesin jo vetëm me Vllazninë, por dhe me MKK Feni Industries.” Kësisoj, basketbolli shqiptar ngre sot siparin.

Kampionati Kombëtar

i Basketbollit – Femra

Java e parë:

(14-15 tetor 2016)

Të premten:

Elbasani – Flamurtari                      ora 14:00

Kamza Basket – Studenti               ora 16:00

Të shtunën:

Goga Basket – Apolonia                 ora 12:00

Vllaznia – Tirana                              ora 16:00

Kampionati Kombëtar

i Basketbollit – Meshkuj

Superliga

Java e parë:

(14 tetor 2016)

Të premten:

Ardhmëria Basket – Flamurtari      ora 17:00

Tirana – Vllaznia                              ora 18:00

Teuta – Kamza Basket                    ora 19:00

Kampionati Kombëtar

i Basketbollit – Meshkuj

Kategoria e Parë

Java e parë:

(14 tetor 2016)

Të premten:

Partizani – Elbasani                                    ora 18:00

Të shtunën:

Apolonia – Skënderbeu                 ora 16:00