ASNN – Tirana dhe Kamza Basket janë dy skuadrat që do të diskutojnë sonte midis tyre finalen e Kupës së Shqipërisë në basketboll për meshkuj. Këto dy skuadra triumfuan në gjysmëfinalen e një dite më parë, përkatësisht ndaj Vllaznisë dhe Partizanit, dhe do të zbresin sonte në parketin e Pallatit të Sportit “Qazim Dervishi” të Shkodrës duke synuar të fitojnë trofeun e dytë të basketbollit shqiptar të meshkujve.

Basketbolli shqiptar i meshkujve do të shpallë sonte fituesen e veprimtarisë së dytë të tij, Kupës së Shqipërisë, kur Tirana të përballet sonte në finale me Kamza Basketin. Dy takimet gjysmëfinale të kësaj veprimtarie u zhvilluan në Pallatin e Sportit “Qazim Dervishi” në Shkodër dhe në takimin e luajtur pasdreke, Kamza Basket nuk pati probleme ndaj Partizanit, duke dominuar në të 4 pjesët e lojës.

26-6, 19-15, 23-17 dhe 26-19 ishin rezultatet përkatëse të secilit 10-minutësh, që në përfundim të ndeshjes fiksuar fitoren e skuadrës së udhëhequr nga trajneri Adem Muhametaj, me shifrat 94-57. Ndërkohë, ishte një tablo krejt tjetër ajo e gjysmëfinales së mbrëmjes, ku Vllaznia dominoi në 3 pjesët e para ndaj Tiranës, duke kryesuar me shifrat 58-51.

Por një pjesë e 4-ët për t’u harruar e shkodranëve, të cilët shënuan vetëm 5 pikë kundrejt 20 pikëve të kundërshtarëve, u dha fitoren bardhebluve kryeqytetas me shifrat 71-63. Finalja e Kupës së Shqipërisë në basketboll për meshkuj, midis Tiranës dhe Kamza Basket do të luhet sonte në Shkodër, duke nisur nga ora 18:00 dhe do të transmetohet drejtpërdrejt në “TeleSport”.

Kupa e Shqipërisë 2016

Basketboll Meshkuj

Gjysmëfinalet:

Sot:

Kamza Basket – Partizani              94-57

Vllaznia – Tirana                              63-71

Finalja

Të enjten:     

Tirana – Kamza Basket                   ora 18:00