Tirana e basketbollit të meshkujve tashmë është gati për të marrë pjesë në Ligën Ballkanike, e cila zyrtarisht do të nisë të hënën e ardhshme në Pallatin e Sportit “Asllan Rusi” në kryeqytet. Bardheblutë e trajnerit maqedonas Sllobodan Petrovski do të presin Trepçës së Mitrovicës, ndërsa ndeshja do të luhet në ora 19:00 dhe kjo skuadër, e ndërtuar jo vetëm për një paraqitje dinjitoze në Ligën Ballkanike, por dhe për të fituar titullin “kampion” e Kupën e Shqipërisë, tashmë njeh vetëm një fjalë, suksesin.

Menaxheri i përgjithshëm i klubit shumësportësh bardheblu, Anxhelo Koleka, tregon të gjitha përgatitjet që ka bërë kjo skuadër dhe po bën pikërisht për ndeshjen e parë ndaj Trepçës së Mitrovicës. “Gjendja e skuadrës, – thotë Koleka për “Sport Ekspres”, – është jashtëzakonisht e mirë. Kemi bërë 5-6 blerje, trajneri që kemi marrë, i cili është maqedonasi Sllobodan Petrovski, është shumë i mirë.”

“Lojtarët janë duke ardhur me qejf në stërvitje, ndërsa me të thënë të drejtën është duke u punuar mirë dhe me dy stërvitje në ditë, – ka vijuar ai. – Në të tilla kushte të gjitha përgatitjet janë për të kaluar grupin dhe nëse arrijmë të fitojmë ndaj Trepçës Mitrovicës dhe Karpos Sokolit 2000 jemi në vendin e katërt. Mos harroni që Vllaznia para dy vjetësh në 10 ndeshje kishte 10 humbje, kurse ne kërkojmë që të bëjmë një paraqitje dinjitoze duke kaluar turin e parë.”

Liga Ballkanike e Basketbollit për Meshkuj

Kalendari i Tiranës:

10 tetor 2016             Tirana – Trepça e Mitrovicës

19 tetor 2016             MKK Feni Industriers – Tirana

26 tetor 2016             Sutjeska Nikshiq – Tirana

9 nëntor 2016           Karpos Sokoli 2000 – Tirana

1 dhjetor 2016           Tirana – Peja

24 nëntor 2016         Trepça e Mitrovicës – Tirana

7 dhjetor 2016           Tirana – MKK Feni Industriers

14 dhjetor 2016        Tirana – Sutjeska Nikshiq

18 janar 2017            Tirana – Karpos Sokoli 2000

25 janar 2017            Peja – Tirana