Tirana e basketbollit të meshkujve ka bërë “tris” në kampionat ndaj Vllaznisë, ndërsa këtë herë, në nisjen e fazës së tretë, në Sallën Sportive “Fahrie Hoti” në kryeqytetat ka fituar me përmbysje. Nëse në dy fazat e para kishte qenë bindëse në sukseset e saj, 82-65 dhe 84-66, apo dhe në gjysmëfinalen e Kupës së Shqipërsë në Durrës, këtë herë i ka “hasur sharra në gozhdë”.

Sepse Vllaznia, e përforcuar fuqishëm në merkaton e dimrit, teksa ka marrë amerikanët Xhekson, Frilav dhe Palmer, por dhe Gjonajn, tashmë nuk është një kundërshtar i lehtë. Përkundrazi ardhja e këtyre lojtarëve, që ka shtuar dhe konkurrencën në skuadrën e Bledar Gjeçajt, i ka vënë në punë dhe të tjerët, të cilët kanë qenë që nga fillimi i sezonit në skuadrën shkodrane.

Dhe Vllaznia, edhe pse dje është mundur me 7 pikë, përsëri është e bukur për të qenë rivale e denjë për titull. Aq më shumë që është kampione në fuqi e basketbollit të meshkujve. Tirana i është falur Shimës e Hysenagollit, që ishin pikëshënuesit më të mirë të ndeshjes, por dhe Voglit e Karajt, të cilët me trepikëshat e tyre kanë qenë vendimtar atëherë kur duhej për të përmbysur.

Fjalë të mira edhe për Laskun e Strazimirin, ndërsa amerikanët Xhonson dhe Rame ende nuk po vijnë aty ku duhet për ta marrë Tiranën përdore e për ta çuar drejt suksesit. E megjithatë Tiranë, me shumë vështirësi, dje ia ka arritur të fitojë.

Tirana – Vllaznia                   73-67

(16-14, 10-24, 29-15, 18-14)

Tirana: Shima (23), Hysenagolli (20), Vogli (6), Karaj (5), Rame / Strazimiri (8), Xhonson (4), Lasku (7), Hasani. Trajner: N. Milatoviç

Vllaznia: Berdica (8), Xhekson (18), Ndoja (2), Frilov (23), Hamati (6) / Gjonaj (7), Palmer, Bekteshi, Arra (3), Da. Lekndreaj. Trajner: B. Gjeçaj

Gjyqtarë: G. Cici, E. Koçi, G. Hoxha (Tiranë)

Kampionati Kombëtar

i Basketbollit – Meshkuj

Superliga

Java e 11-të

(3-4 shkurt 2017)

Të premten:

Tirana – Vllaznia                              73-67

Teuta – Kamza Basket                    78-86

Të shtunën:

Flamurtari – Ardhmëria Basket      ora 13:00

Renditja

Nr.       Skuadra                     N.        F.         H.        Psh-Pp           Pikë

1. Tirana                         11        10          1        1012-734       21
2. Teuta                          11          8          3          868-730       19
3. Vllaznia                     11          6          5          819-773       17
4. Kamza Basket          11          6          5          870-873       17
5. Ardhmëria Basket    10          2          6          660-682       12
6. Flamurtari                  10          0        10          519-957       10