ASNN – Skënderbeu në basketboll për meshkuj edhe dje, në javën e 5-të Kategorisë së Parë, ka pësuar humbjen e radhës, teksa deri në këtë moment numëron 4 humbje në po kaq ndeshje. Nga ana tjetër, skuadra private kryeqytetase e Tirana Eagles Basket me këtë fitore i është afruar Partizanit kryesues duke qenë vetëm një hap larg të kuqve.
Fitorja e djeshme në Korçë për kryeqytetasit ishte më shumë se e lehtë, teksa interesante kjo ndeshje ka qenë vetëm 20 minutat e para, ose thënë ndryshe në gjysmën e parë, sepse më pas frenat e lojës në dorë i mori Tirana Eagles Basket. Më konkretisht, në pjesën e parë të ndeshjes loja ka qenë e barabartë.
Këtë e tregojnë edhe shifrat në fundin e saj, pasi gjithçka mbyllet 12-12. 10 minutat e dyta të takimit edhe këto kanë pasur disi rivalitet, por që në fund miqtë kanë një epërsi prej katër pikësh 8-12. Kësisoj, gjysma e parë është mbyllur 20-24. Mund të themi që ka pasur gabime të shumta nga të dy skuadrat, sidomos në gjuajtjet për 3 pikë.
Pas pushimit Tirana Eagles Basket merr frenat e lojës në dorë dhe bën diferencën në pjesën e tretë, duke e fituar bindshëm atë 11-23 dhe duke thelluar epërsinë në 31-47. Edhe e 4-ta është fotokopje e së 3-ës dhe vetëm sa shtohet kjo diferencë teksa ky 10-minutësh mbyllet 9-20 për kryeqytetasit, ndërkohë që krejt ndeshja përfundon 40-67.
Skënderbeu – Tirana Eagles Basket 40-67
(12-12, 8-12, 11-23, 9-20)
Skënderbeu: Bala, Thanas, Habip, Duci, Gërmenji / Simaku, Terolli, Topi, Bello, Treska, Qazimllari. Trajner: I. Nika
Tirana Eagles Basket: Adili, Allaraj, Nikolli, Shytaj, Shehi / Vogli, Nasi, Prodani, Musta, Kala, Zavalani, Nallbani. Trajner: J. Dashi
Gjyqtarë: A. Dulçe, Y. Harasani (Tiranë)
Kampionati Kombëtar
i Basketbollit – Meshkuj
Kategoria e Parë
Java e 5-të:
(12 nëntor 2016)
Të shtunën:
Skënderbeu – Tirana Eagles Basket 40-67
Elbasani – Apolonia 62-67
Renditja
Nr. Skuadra N. F. H. Psh-Pp Pikë
- Partizani 4 4 0 327-199 8
- Tirana Eagles Basket 4 3 1 264-217 7
- Apolonia 4 2 2 220-300 6
- Elbasani 4 1 3 269-293 5
- Skënderbeu 4 0 4 240-311 4
